اسلام آباد۔18مارچ(اے پی پی) وزیر خارجہ مخدوم شاہ محمود قریشی پارینے کہ چین نا دورہ ءِ کننگ نا مسخت چینی سرکڑدہ و الس تون یکجہتی نا درشانی ءِ کننگ ئس، چین و پاکستان نا تعلقداریک بے مٹ ءُ نن ہر مشکل وخت اٹی اسہ ایلو تون تفینن۔ چارشنبے نادے آ چین نا دورہ و کورونا وائرس آگاہی نا بابت اہم بیان اٹی وزیر خارجہ پارے کہ اینو ہراتم چینءِ مشکل وخت اتون مون تروک ئس تو ننے اوفتے تون یکجہتی نا درشانی ءِ کننگ ئس۔ ہراتم کورونا وائرس نا دین مون آ بس توگیشتر ملک آک تینا شاری تے چین آن کشار ہرادے چین بے پتی نا اشارہ سمجھا وخت اس کہ پاکستان چین نا حکومت آ پت انا درشانی ءِ کرسا تیان طالب علم آتے ہموکان کشیپننگ نا فیصلہءِ کرے۔ اوپارے کہ دروہراتم ننا چینی صدر، وزیراعظم و ایلو سرکڑدہ غاتون اوڑدہی مس تو اوپاکستان نا فیصلہ و چین آ پت انا بے حد ستاءِ کرے۔ درو ننا ویڈیو کانفرنس نا کمک اٹ ووہان نا چندی یونیورسٹی تیٹی خوانوک آ پاکستانی طالب علم آتون گپ وتران مس۔ الحمد اللہ او غٹ جان جوڑی و پرعزم ئسرچینی حکومت اوفتا بے حد خیال ءِ تخا۔ چار پاکستانی مسن تے اللہ تعالیٰ اولاد نا نعمت ءِ تس۔ دا طالب علم آتا پاننگ ئس کہ مہالو ننا لمہ و باوہ ءِ ننا فکر ئس داسہ ننے اوفتا فکر ءِ۔ وزیر خارجہ پارے کہ صدر پاکستان ڈاکٹر عارف علوی و ای اوفتے وار وار آپاریٹ کہ نن اسہ ہندن ءُ ہند اسے ٹی رہینگ انگ اورے ہرا دا دین نا مقابلہءِ کرینے و سرسہبی دوئی کرے نم سوشل میڈیا نا کمک اٹ پاکستانی قوم ءِ تینا آزموندہ غاتیان معلومدار کبو نما کلہو آک اوفتے حوصلہ و ہمت ایترہ۔ ننے چینی سرکڑدہ غاک دا دین اتون مون تننگ کن پورو حوال تسر۔ ننے ذہنی وعڑاٹ داہیت ءِ پہہ مروئی مریک کہ دا وائرس تالان مننگ کیک ولے جوان ءُ لائحہ عمل اس تینا کروئی مریک۔ دا چرجوئی ٹی مسہ بنداوی گام گیج ءُ ہرافتا کمک اٹ چین دا دین نا سرسہبی دوئی کرے۔ اولیکو نمبر آ کمکاری و پت ءِ چینی حکومت انت کہ پارت اس جاری کرے چینی الس من و عن اوفتیا عمل کریر و حکومت تون پورو کمک کریر۔ ارٹ میکو ہیت یکجہتی ءِ چین اٹی غٹ اواری اٹ دا دین نا مقابلہ ءِ کریر اسہ صوبہ اس ایلو صوبہ غا نکتہ چینی کتو بلکن ووہان، ہرا دا وائرس آن غٹ آن زیات زہمی ئس ہموڑے غٹ اواری اٹ کمک کریر۔ اوپارے کہ چین ہراوڑ ہزار آتا کچ اٹی والینٹیرز آفت زدہ علاقہ غاتے ٹی گدریفے او ہم ننکن گچین ءُ مثال اسے۔ مسٹ میکو و اہم ہیت آگاہی ءِ۔ دادین نا تالانی ہمووخت آ کم مریک ہراتم پاریزی ءِ تینا کننگے۔ اومیڈیا غان خواست کرے کہ نم ہراوڑ دا دین نا بابت آگاہی مہم اس چلیفنگ اورے اودے زمواری اس سرپند کرسا برجاتخبو خلقت ءِ رکھی گام گیج آتیان معلومدار کرسا کبو۔ اوپارے کہ کنا ایران نا وزیر خارجہ تون ٹیل فون رابطہ مس ای ہموڑے کورونا وائرس آن زوال کروک آتیا اوڑتون است ہسونی نا درشانی ءِ کریٹ اوڑآن خواست کریٹ کہ ننا بھلو کچ اسے ٹی ہرا زائر آک ایران اٹی ءُ اوفتا واپسی یقینا مروئی ءِ ولے ننا خواست ءِ کہ غٹ ءِ یکجا گدریفنگپ ننے ہنداخو موقع اس تننگے کہ نن تفتان بارڈر آ جوان بست و بند کننگ کین۔ نن سعودی عرب آن ہم خواست کرین کہ او عمرہ کننگ کن ہموڑے ساڑی پاکستانی تا واپسی کن تینا 72گھنٹہ نا پالیسی ٹی نرمی کہ تانکہ ننا جہاز آک ہموڑے بننگ کیر و اوفتا پدی اتنگ نا بست وبند ءِ کننگ کیر۔ ننے توازن ءِ برقرار تخوئی مریک اسہ کنڈ نیزگار مزور خلقت ءِ اگہ پورو لاک ڈاؤن مریک تو اوفتے کن روزگار نا ویل ودی مریک و اگہ نم بالکل نظرانداز کبو تو ولدا دا دین نا تالانی نا گڑتی ءِ۔
