اسلام آباد۔ 18مارچ(اے پی پی) بنجائی وزیر تعلیم شفقت محمود پارینے کہ پاکستان اٹی کیمبرج سسٹم تون اوار غٹ بورڈآتا امتحان تے ملتوی کننگانے، حالیت آتا گچین مننگ نادروشم اٹ بورڈانا امتحانک یکم جون آن پد مریرہ، کورونا وائرس نا بابت جاچ ءِ ہلسا کینہ، طالب علم آتا رکھ اکن اولیتی بنداو تیا گام گیج کننگ اُن، وزیراعظم عمران خان ءِ دا غٹ فیصلہ و حالیت آتیان معلومدار کرین، 27مارچ آ بین الصوبائی وزراء کانفرنس ءِ بٹنگ انگانے ہراٹی 5اپریل آن پد اسکول آتے ملنگ نا فیصلہءِ کننگک، فیڈرل بورڈ اٹی اسہ مرکز اسے ٹی پیپر مارکنگ کروک آتا کچ 40آن زیات مف۔ داخیال آتا درشانی ءِ او چارشنبے نادے آ پریس انفارمیشن ڈیپارٹمنٹ اٹی پریس کانفرنس اٹی کرے۔ بنجائی وزیر پارے کہ حکومت غٹ تعلیمی ادارہ غاتے 5اپریل اسکان بند کننگ نا فیصلہ ءِ کرینے ہراڑآ پورو عملدرآمد مننگ ءِ۔ آخبت نا لائحہ عمل کن صوبائی وزیر تعلیم آتون رابطہ ٹی اُن، 27مارچ آ آخبت نا لائحہ عمل نا فیصلہ ءِ کینہ۔ اوپارے کہ مچ آ ملک اٹی یکم جون اسکان غٹ امتحان تے ملتوی کننگانے۔ کیمبرج سسٹم تون اوار غٹ بورڈ انا امتحان تے پد بٹنگانے۔ اگہ حالیت آک گچین مریرہ تو بورڈ انا امتحانک یکم جون آن پد مریرہ۔ کیمبرج امتحان تا فیصلہ ءِ کیمبرج ءِ کروئی ءِ انتئے کہ ایلو جاگہ غاتیا ہم امتحانک مفسہ۔ تدوک آ انٹر پراونشل میٹنگ اٹی فیصلہ کننگاکہ یونیورسٹی ٹی داخلہ غاتا شیڈول ءِ ہم اسہ تُو کن پد بٹنگانے۔ دا گام گیج آتے داخاطرآن کننگ انگءِ تانکہ چناک دانا رداٹ تینا تیاری ءِ کننگ کیر۔ نن یونیورسٹی تے ہم ہاسٹل آتے خورک کرفنگ ناپارت کرین ولے بیرہ درملکی طالب علم آک ہی ہاسٹل اٹی رہینگ انگ کیرہ۔ فیکلٹی نا اسکول و یونیورسٹی تیا بننگ المی اف ولے اگہ انتظامیہ اوفتے بٹنگے او ولدا او بننگ کیرہ۔ نن کوشست کننگ اُن کہ اُراتیٹی خواننگ نا وڑوڈول اس تینا کننگے کہ چناک آن لائن لیکچر ہلنگ کیر۔ دا بابت پی ٹی وی تون ہیت وگپ مننگءِ۔ اوپارے کہ کورونا نا سوب آن مچ آ دنیا اسہ بھاز بھلو چیلنج اسے آن گدرینگ انگ ءِ ، بنی نوع انسان ءِ تاریخ اٹی داخہ بھلو چیلنج اسے تون مون تروئی تمتنے۔ اوپارے کہ تعلیم نا بشخ ننا غٹ اکن بھاز المی ءِ۔ ننا وزیراعظم عمران خان ءِ اسہ ہی گڑتی اسے کہ نن چناتا رکھ ءِ امر کینہ۔ دا ناجوڑی ملنگ آن زیات تالان مننگ ءِ، مچی آن پاریز کننگ المی ءِ۔ اوپارے کہ 27مارچ آ بین الصوبائی وزراکانفرنس اس بٹنگ انگانےہراٹی 5اپریل آن پد اسکول آتے ملنگ نا فیصلہ ءِ کننگک۔ اوپارے کہ امتحان تا معاملہ ءِ سکول بندش آن جتا تخانن، اسکول آتا بند کننگ نا فیصلہ ءِ حالیت آتا جاچ ءِ ہلسا کرسا کننگک۔ یکم جون آن پد ہرا شیڈول امتحان تا چرجوئی برجاسلنگ کیک، اگہ حالیت آک سہی مریرہ۔ اوپارے کہ استاد و پروفیسر نا ادارہ غاتے ٹی بننگ المی اف، اگہ ادارہ غاتے گرج تما تو بٹنگ انگ مریک۔ اوپارے کہ پنچ اپریل آن مون آ ہِننگ نا دروشم اٹ وزارت تعلیم چندی سلاہ تیا سجفنگ انگ ءِ۔ شفقت محمود پارے کہ لوک ورثہ ، پی این سی اے ٹی غٹ کلچر پروگرام تے منسوخ کننگانے۔ ایچ ای سی ٹیکنالوجی سپورٹ کمیٹی، کانٹینٹ کمیٹی تون اوار چندی کمیٹی تے ٹہیفینن۔ بنجائی تعلیمی بورڈ اٹی امتحانی پیپرز آتا مارکنگ نا بابت اسہ سوج اسے نا ورندی ٹی اوپارے کہ دابابت اودے حالیت آتا سما اف کہ اسہ جاگہ غا تولسا پیپر آتا مارکنگ ءِ کننگ انگءِ ولے اگہ اسہ ہی وخت اٹی مارکنگ کروک آتا کچ 40آن کم ءِ تو ولدا سہی ءِ ولے داکان زیات کچ اٹی اگہ مارکنگ مریک تو ولدا داڑآن وائرس نا تالان مننگ نا گڑتی ہم مننگ کیک ولے دُن تو سسٹم ءِ ہم چلیفوئی ءِ ہنداخاطرآن کوشست کننگے کہ اسہ وخت اٹی مارکنگ کروک آتا کچ زیات مف و اگہ زیات بندغ مریر تو ولدا چنکو چنکو پینلز جوڑ کرسا فرض ءِ انجام تننگے۔
