اسلام آباد۔ 18مارچ(اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ (ن)لیگ کورونا وائرس نا دَین کون آ حساس ویل آہم سیاسی دوکان ءِ خلنگ آن سلتوس، وزیراعظم عمران خان نا کنڈآن الس نا رکھ، فائدہ و سلامتی کن چست کروک آ وخت آ گام گیج آتا شاہدی ءِ دنیا تننگ ءِ، جہانی ادارہ جان جوڑی نا بیان اونا شاہدی ءِ، الس نا دڑد و احساس مسکہ تو آزمائشت نا دا ساہت اٹی (ن) لیگ نا سرکڑدہ تینا ہم وطن آتون سلیسکہ۔چارشنبے نادے آ خصوصی کمکار ڈاکٹر فردوس عاشق اعوان تینا ٹویٹ اٹی پارے کہ فارن فنڈنگ نا غوغا کننگ نا جاگہ غا فارن اکاؤنٹ تخوک آک فارن اٹی تولوک تینا سرکڑدہ ءِ پاکستان آ بننگ نا خواست کیر، (ن) لیگ مدام پیشن نا ملک اٹی رہینگوک محب وطن پاکستانی تیا جلہو کرے ہرا پاکستان آ تینا پیسہ غاتے گدریفرہ، اوورسیز پاکستانی تا عمران خان نا کماشی آ پت ءِ۔ اوپارے کہ کاش احسن اقبال دا سیاسی راہشون تا برخلاف توار بڑز کریکہ ہرافک پاکستان نا الس نا جیب آتے کاٹ کریر و لندن آ نرار۔ منی لانڈرنگ کریر و پاکستان آن پیسہ غاتے پیشن گدریفیر۔ اوپارے کہ سیوت و اسٹی وخت انا خواست ءِ، سیاسی پوائنٹ سکورنگ نا جاگہ غا اپوزیشن کورونانا جہانی چیلنج آتون مون تننگ کن قومی کوشست آتے سوگوی ایتر، دا قومیءُ ویل اسے ، اسٹ مرسا وائرس ءِ شکست تروئی ءِ۔
