اسلام آباد۔18مارچ(اے پی پی) منیجنگ ڈائریکٹر پاکستان بیت المال عون عباس بپی پارینے کہ راجی رکھ انا پڑاٹ مون تروک ویل آتے ایسر کننگ کن چست کروک آ گام گیج آتا خاطر خواہ بھرم دوئی مننگ ءِ و مچ آ ملک اٹی مر مر انگا و پدسلوک آ علاقہ غاتا حقدار آتے ہم فائدہ تننگ انگ ءِ۔ داخیال آتا درشانی ءِ او وزیراعظم نا سلاہکار خزانہ و محصولات ڈاکٹر حفیظ شیخ تون اوڑدہی ٹی کرے۔ ڈاکٹر حفیظ شیخ ءِ دا گام گیج آتا بابت ہم معلومدار کننگا ہرافتا کمک اٹ راج انا نادرا و نزور بندغ آتے کن مفت درمان ، تعلیمی وظیفہ ، زرگزرانی بحالی و خودانحصاری کون آ گام گیج آتا سوب اوفتے زرگزرانی و راجی حق انا فراوانی ءِ پک کننگ انگ ءِ۔ ایم ڈی پاکستان بیت المال پارےکہ ہمو پدسلوک آ ضلع غاتا پیدوار ءِ کننگانے ہرافتے مستین اٹ محروم تخنگا و ادارہ نا دوئی بجٹ ءِ داوڑنا ضلع غاتا آبادی و نیزگاری نا تناسب اٹ جتا کننگانے۔ منیجنگ ڈائریکٹر نا کنڈان ادارہ نا صوبائی ڈائریکٹرآتے اختیارات منتقل کننگانے تانکہ وزیراعظم پاکستان نا پارت آتیا عمل کرسا ضرورت مند بندغ آتے اوفتا درگہ غا دادرسی ءِ پک کننگ مرے۔ وزیراعظم نا سلاہکار خزانہ و محصولات ڈاکٹر حفیظ شیخ پاکستان بیت المال نا السی راجی گام گیج آتا ستاءِ کرے و منیجنگ ڈائریکٹر پاکستان بیت المال نا سلاہ آ عمل کرسا پاکستان بیت المال نا غٹ علاقائی دفتر آتا اسائنمنٹ اکاؤنٹ آتے ملنگ و سہ ماہی بنداو تیافنڈ منتقل کننگ نا باوری کرفے تانکہ حقدار آتا گچین وڑاٹ و وخت آ اعانت ءِ کننگ مرے۔
