اسلام آباد ۔ 17 مارچ (اے پی پی) مزن وزیر عمران خان ءَ گوشت کہ ما راج ءِ بستار ءَ کورونا وائرس ءَ مقابلہ کناں ءُ ایشی ءِ ھلاپ ءَ جنگ ءَ باج براں، وائرس ءَ چہ پریشان بوھگ ءِ ضلورت نہ انت، ما شر سرپد آں کہ چین ءَ وائرس شنگ بوتگ ایش پاکستان ءَ کئیت ءُ سر بیت، کورونا ءِ جیڈھ ءِ سر ءَ ابکہ بوھگی نہ انت اے وائرس یک زکام ات ایش گوں ترندی ءَ شنگ بوھگ ءَ انت، کورونا وائرس ءَ چہ 97 درسد مریض جان سلامت بنت، دگنیا ءَ انوگ ءَ تاں یک لکھ 90 ہزار مردم وائرس ءَ چہ آماچ بوتگ انت، کورونا ءَ چہ میاں اوستمانی معیشت ءِ سر ءَ ھرابیں رند پد نکش بوھگ ءَ انت، معیشت ءِ سر ءَ حکومت ءِ نگاہ پر انت، بلوچستان ءِ دور ءُ گستائیں دمگ آنی تہ ءَ گامگیج بلوچستان حکومت ءُ پاک فوض ءِ کرد لائک ءِ ستا انت، وبا ءَ گوں گر ءُ چیل بوھگگ ءِ واستہ چین ءِ تجروبت ءَ چہ سیت گراں، ہیلتھ ورکرز ءُ طبی کارندہ آناں توامیں آسراتی پجارین آں، ڈن ملک ءَ استیں پاکستانی آنی مشکل آنی سما انت، چین ءِ شہر ووہان ءَ نندوکیں پاکستانی نودربر آنی مشکل آں چہ شر سرپد آں، ترس انت کہ بازیں کس چنگ ءُ مچ کنگ ءُ امبار جوڑ کنگ ءِ کوشست ءَ بکن انت، امبار جوڑ کنوک آناں مکن کناں کہ ایشانی ھلاپ ئَ کاروائی کنگ بہ بیت، ریاست امبار جوڑ کنوک آں گوں اچ نرمی مکنت، کرونا وائرس ءَ چہ بچگ ءِ واستہ شہر آنی بند کنگ ءِ شور ءُ سلاھ پاکستان ءِ جاور آنی گوما ھمدپی نہ کنت، الس ھوپ ءَ چہ بچگ ءِ واستہ ٹوھیں مُچی ءِ تہ ءَ روگ ءَ وتا بہ پھریز انت، رکھینگ ءُ سرپدی گامگیج ءِ واستہ عالم آناں وتی کرد ءَ را پیلو کنگ لوٹ ایت۔ آئی ءَ اے ھیالانی درشانی سئے شمبے ءَ راج ءَ گشتانک دیان ءَ کت۔ مزن وزیر عمران خان ءَ گوشت کہ اے پھمگ المی انت کہ کورونا ءِ ھوپ ءِ سبب ءَ تچ ءُ تاگ ءُ ابکہ بوھگ نہ لوٹ ایت، 15 جنوری ءَ ما پیسلہ کت کہ کورونا وائرس ءِ جیڈھ ءِ گیواری ءِ واستہ چے گامگیج کنگی انت، چین ءَ وھد ءِ اے وائرس شنگ بوت گڈا مارا اے زانتکاری است کہ چین ءَ چہ مردم پاکستان ءَ کاینت۔ آئی ءَ گوشت کہ اے وائرس یک رنگیں کاز ات ایش گوں ترندی ءَ شنگ ءُ تالان بیت۔ بلے دومی نیمگ ءَ اے دل یکیمی ءِ گپ ات کہ 97 درسد مریز جان سلامت بنت ءُ 4 ءَ چہ 5 درسد مردم آناں کُلگ ءُ پشانک ءِ وڑیں نادرھی بیت ہسپتال ءَ روگ کپ ایت۔ آئی ءَ گوشت کہ انوگ ءَ تاں دگنیا ءَ یک لکھ 90 ہزار مردم کورونا وائرس ءِ آماچ بوتگ انت ءُ دیمروئی کنوکیں ملک ءِ ہسپتال ءَ آسراتی ھم گیش بنت۔ ایشی ءِ ترندی ءَ شنگ ءُ تالان بوھگ سک بیم ناک انت ءُ 100 ءَ چہ 3 درسد مریز ءِ واستہ اے بیم ناک بیت ءُ اے انچیں مردم انت بنت ھما کہ مزن امبر انت۔ آوانی توک ءَ سٹرگل “قوت مدافعت” کم بیت، یا آ چاتی ءِ نادراھی ءُ دگہ نادراھی آنی آماچ بنت۔ مزن وزیر ئَ گوشت کہ ما چین ءَ گوں رابطہ ءَ آں، ایران ءَ قم شہر ءَ چہ ھوپ ءِ بندات بوتگ ءُ آھودا پاکستان زیارت کنوک ھم آماچ بوتگ انت، ایران ءِ حکومت ءَ گوں مئے رابطہ انت ھما زیارت کنوک کہ ب لوچستان ءِ کشک ءَ واپس پیداک انت ایشاناں قرنطینہ ءَ دارگ بہ بیت ءُ اے ویرانگیں دمگ ءَ آواناں توامیں آسراتی پجارینگ یک مشکلیں کار ے ات بلے اے رد ءَ بلوچستان ءِ حکومت ءُ پاک فوج ءِ انتظامی لائک ءِ ستا انت۔ مزن وزیر ءَ گوشت کہ ما دگنیا ءِ جاور ھال آناں ھم یک شل ءَ چارگ ءَ آں، 15 فروری ءَ چہ پد 9 لکھ مردم ائیر پورٹس ءِ سر ئَ سکریننگ کنگ بوتگ، 26 فروری ءَ کورونا وائرس ءِ اولی کیس دیم ءَ اتکگ، مارا اے اندازگ بوتگ کہ اے ھوپ ترندی ءَ گوں شنگ ءُ تالان بیت، گوستگیں ھپتگ ءَ راجی سلامتی کمیٹی ءِ دیوان برجم دارگ بوت ءُ اے وھد ءَ تاں 20 مریز دیم ءَ اتکگ انت۔ آئی ءَ گوشت کہ مارا ترسگ نہ لوٹ ایت، مسلمان بوھگ ءِ بستار ءَ مئے ایمان انت کہ زندمان ءُ موت اللہ پاک ءِ دست ءَ انت ءُ حضور اکرم ؐ ءَ ھم مارا پھریزگ ءِ گوشتگ ءُ آئی ءِ گوشتگ کہ وتا بہ پھریز ات اگاں شمارا ترس انت کہ شمے اوشتر مہ تچ ایت گڈا پیسر ءَ ایشرا بند کنے۔ آئی ءَ گوشت کہ ہیلتھ ورکرز، ڈاکٹر ءُ طبی کارندہ آناں کورونا ءِ ھلاپ ءَ جہاد کنگی انت ءُ ایشرا ما توامیں آسراتی پجارین آں۔ مزن وزیر ءَ گوشت کہ ڈن ملک ءِ نندوکیں پاکستانی آنی مشکل آنی بابت ءَ مارا سما انت ءُ سفارتخانہ آناں پاکستانی آنی ھیال داری کنگ ءِ پنت ءُ شون جاڑی کنگ بوتگ۔ ووہان ءَ پس اتگیں پاکستانی نودبر ءُ ادا استیں مات ءُ پت آنی مشکل آنی بابت ءَ مارا شر سما انت، آئی ءَ گوشت کہ مارا اوپار کشی ءِ گوما کار کنگی انت۔ مزن وزیر ءَ گوشت کہ آئی ءِ گشتانک ءِ مول ءُ مراد راج ءِ کورونا ءِ گر ءُ دار ءِ واستہ گامگیج ءِ ھوالگ ءَ دل یکیمی ءَ گوں کار کنگی انت۔ کورونا ءِ جیڈھ ءِ ھوالگ ءَ تچ ءُ تاگ ءُ ابکہ بوھگی نہ انت۔
