لاہور۔17مارچ(اے پی پی) تحریک انصاف نا سینئر مرکزی راہشون و مسکوہی بنجائی وزیر ہمایوں اختر پارینے کہ کورونا وائرس اسہ المیہ سے ولے آل شریف لندن اٹ تولسا دا باندات آہم سیاست کننگ ءُ، قوم سوج کننگ ءِ کہ شہباز شریف قائد حزب اختلاف ءِ او وطن آ پدی برساانت اکن تینا کڑد ءِ ادا کپک، کورونا وائرس آن دنیا نا شون ہلوک آملک آن سُرانو، ہنداخاطرآن وزیراعظم عمران خان کورونا وائرس نا مفنی زہم تیان زرگزران ءِ رکھ تخنگ کن پیشگی ڈٹ بندی نا پارت کرینے۔ تینا بیان اٹی ہمایوں اختر خان پارے کہ حکومت کورونا وائرس نا تالانی ءِ توننگ کن گچین گام گیج کننگ ءِ و داڑکن وخت آ عملی گام گیج چست کننگانے۔ کورونا وائرس نا سوب آن شون ہلوک ملک آتے ٹی زرگزران نا رفتار بے کچ سستی نا گواچی ءِ و ہموڑے پالیسی ریٹ اٹی کمتی اتنگانے۔ وزیراعظم عمران خان ساڑی حالیت آتے ٹی دے و نن ءِ اسٹ کرینے و زرگزرانی ٹیم ءِ پاننگانے کہ او کورونا وائرس نا منفی زہم تے کم آن کم کننگ کن ہروڑنا گام گیج چست کیر۔ اوپارے کہ چینی قوم مشکل وخت اتون مون تننگ کن پبی سیوت نا درشانی ءِ کریر وخت اس کہ داڑے سیاست کننگ انگ ءِ، مریم نواز پیشن پیش تمانے تو او انت کڑد اس ادا کرینے ، آل شریف داوخت آ لندن اٹی پناہ ہلکونو، قوم سوج کیک کہ شہباز شریف قائد حزب اختلاف ءِ او انت اکن پدی برسا تینا کڑد ءِ ادا کپک، قومی پالیسی نا ہیت ءِ تو کننگک ولے قائد حزب اختلاف پیشن تولوک ءِ، حکومت بیان بازی نا جاگہ غا عملی وڑاٹ میدان اٹ پیش تمسا کاریم کننگ ءِ۔ اوپارے کہ مچ آ قوم دعا کے کہ اللہ تعالی پاکستانءِ زوت آن زوت کورونا وائرس کون آ مشکل آن خلاصی ایتے و ملک ءِ رکھ کے۔
