اسلام آباد۔ 17مارچ(اے پی پی) کورونا وائرس نا ودوک آ گڑتی تا رداٹ وزارت خارجہ چندی دستاویز آتے پک کننگ کن الس نا قونصلر سروس آ بننگ نا عمل ءِ تورینے۔ سے شنبے نادے آ دفترخارجہ غان جاری بیان نا رداٹ قونصلر سروسز آ دا پابندی 18مارچ آن 3اپریل 2020ء اسکان برقرار سلک، اوکان پد حالیت آتا ولدا جاچ ءِ ہلسا آخبت نا بابت پڑو کننگک ولے بیرہ، پاور آف اٹارنی (مختارنامہ) ءِ پک کرفوک آ بندغ آتے رسینگ نا موکل پدریسہ مریک۔ الس نامشکل آتے مون آتخسا چندی سند آتے پک کنگ نا عمل پاکستان پوسٹ، جیریز، لیپرڈو ٹی سی ایس کون آ کوریئر کمپنی تا کمک اٹ انجام تننگک۔ الس دا وڑوڈول ءِ اختیار کرسا تینا دستاویز آتے وزارت خارجہ غا مون تننگ کیرہ۔ وزارت خارجہ کورونا نا بابت ودی مروک حالیت آتے ٹی اسہ خصوصی کوآرڈینیشن سیل اس ہم جوڑ کرینے ہرا اسپیشل سیکرٹری(ایڈمنسٹریشن) نا چاروکی ٹی کاریم کیک۔ دا سیل پاکستان اٹی جوڑ سفارت خانہ و پیشن نا ملک آتے ٹی جوڑ پاکستانی مشن آتونرابطہ ٹی مریک۔
