اسلام آباد۔17مارچ(اے پی پی) تدوک آ 24گھنٹہ ٹی کورونا وائرس نا شکبر 100پوسکن ءُ کیس رپورٹ مس ہراڑآن شکبر کیس آتا کچ 533مسنے۔ وزارت قومی جان جوڑی نا کنڈآن جاری کروک حساب وکتاب نا رداٹ داٹی 499بندغ نا ٹیسٹ ءِ کننگا وخت اس کہ داوخت اسکان 1571بندغ آتا کورونا وائرس نا ٹیسٹءِ کننگانے ہرافتیان مچ آ ملک اٹی کورونا وائرس آن زہمی بندغ آتا کچ 187ءِ۔ رپورٹ نا رداٹ 4مریض آتے جان جوڑ گوندسا ہسپتال آن ڈسچارج کننگانے ولے 183بندغ ملک انا جتا ہسپتال آتے ٹی درمان مننگ ءُ۔ رپورٹ نا رداٹ تدوک آ24گھنٹہ ٹی بنجائی دارالحکومت اٹی7مشتبہ کیس، پنجاب 17، سندھ اٹی 5، خیبر پختونخوا ٹی 25، بلوچستان اٹی 33، آزاد جموں کشمیر اٹی 11 و گلگت بلتستان اٹی 2مشتبہ کیس رپورٹ مسنے۔ ہنداوڑ تدوک آ 24گھنٹہ ٹی مشتبہ کیس آتا کچ 100مسنے۔ وزارت قومی جان جوڑی نا حساب وکتاب نا رداٹ داوخت آ بنجائی دارالحکومت اٹی کورونا وائرس نا مشتبہ کیس آتا کچ 76، پنجاب اٹی 112، سندھ اٹی 140، خیبرپختونخوا ٹی 92و خیبر پختونخواہ نا عارضی بے اُرابندغ آتے ٹی 5، بلوچستان اٹی 103، آزاد جموں کشمیر اٹی 20و گلگت بلتستان اٹی 25مشتبہ کیس رپورٹ مسنے ہراڑآن جم کچ 533مسنے ہرافتیان بیرہ 187بندغ آتے ٹی کورونا وائرس نا نمونہ مثبت بسنے۔ سرجم حوال آتارداٹ داوخت اسکان بنجائی دارالحکومت اٹی مثبت کیس 3، پنجاب اٹی اسٹ، سندھ اٹی 147، خیبر پختونخوا ٹی 15و بلوچستان اٹی 14 وخت اس کہ گلگت بلتستان اٹی مسہ مریض زیر علاج ءُ۔ رپورٹ نا رداٹ بنجائی دارالحکومت آن اسٹ و سندھ آن مسہ مریض آتے جان جوڑ گوندسا ڈسچارج کننگانے۔ وزارت قومی جان جوڑی نا رداٹ تدوک آ24گھنٹہ ٹی ملک انا چندی داخلی ہند آتیا 20ہزار 187بندغ آتا سکریننگ ءِ کننگانے ہرافتیان مشتبہ کیس آتا کچ 95ءِ۔ داوخت اسکان چین و ایران تون اوار ایلو ملک آتیان پاکستان آ سرمروک آ9لکھ 95ہزار821مسافر آتا سکریننگ ءِ کننگا۔
