بیجنگ۔ 17مارچ(اے پی پی) وزیر خارجہ شاہ محمود قریشی پارینے کہ سی پیک تون ننا زرگزرانی شونداری گنڈوک ءِ ۔ نن پاک چین سنگتی ءِ ڈیہہ ٹی شونہالی نا کلہو اسے نا وڑاٹ مون آ اتنگ خوانہ۔ سے شنبے نادے آ بیجنگ اٹی پاک چین بے مٹ سنگتی و تینا دورہ چین نا غرض و مسخت آتا بابت میڈیا تون گپ و تران کرسا وزیر خارجہ پارے کہ تاریخ گواہ ءِ کہ زمی جمب مرے، نوکاپ مرے یا پین آفت اس مرے، چین انا سرکڑدہ و الس ہر سخت انگا وخت اٹی پاکستان تون سلیسونو، اینو چین آ کرونا وائرس نا دروشم اٹ سخت ءُ وخت اس بسنے تو نن پاکستان نا وزیراعظم عمران خان و پاکستانی الس نا کنڈآن تینا چینی ایلم تتون یکجہتی نا درشانی ءِ کننگ کن بسونن۔ اوپارے کہ چین ہراوڑ کرونا وائرس کون آ چیلنج تون مون تس و ہرانظم و ضبط نا درشانی ءِ کرینے دانا مٹ ملپک۔ ہزار آ خلقت کوروناآن زہمی مسر ولے کمال قومی یکجہتی نا درشانی ءِ کننگا۔ دے تیٹی ہسپتال جوڑ کننگا و اینو چین کم و ود دا دَین نا مون ءِ تورینے ہمو صوبہ ہراڑے دَین نا تناسب بھاز زیات ئس ہموڑے اینو بیرہ اسہ کیس اس رپورٹ مسنے و مچ آ چین اٹی بیست ءُ یک کیس رپورٹ مسنے۔ کورونا وائرس آن انفیکشن نا کیس آتے ٹی داخہ در کمتی بھاز بھلو سرسہبی اسے۔ سی پیک نا بابت اوپارے کہ سی پیک اتون ننا زرگزرانی شونداری گنڈوک ءِ و داڈٹ آن مچ آ ڈیہہ ءِ فائدہ مریک ہڑتوم آ ملک آتا سرکڑدہ غاک دا ڈٹ آتے ایسر اسکان سرکننگ کن سنبرینگوک ءُ ہندن ہندن نن کورونا وائرس نا چیلنج آن پیش تمینہ ہندن ہندن سی پیک نا ڈٹ آتا پوروی مرسا کیک۔ وزیر خارجہ پارے کہ پاکستان و چین نا نیام اٹ تعلقداریک بے مٹ ءُ۔ پاک چین سنگتی نا مثال دنیا ترسا بننگ ءِ۔ تدوک آ یک و نیم سال اٹی دا ننا چین نا ، چارمیکو بڑزکو کہولی دورہ ءِ، ہنداکان نم اندازہ خلبو کہ ننا تعلقداریک اخس ٹھوس و کڑمب ءُ۔ اسہ سوج اسے نا ورندی ءِ ترسا وزیر خارجہ پارے کہ زرگزرانی پڑ مرے، ہڑتوم آ کنڈآتا واپار مرے، نیزگاری نا چٹفنگ و انفراسٹرکچر ڈویلپمنٹ اٹی نن اسہ ایلو تون کمکاری ءِ برجاتخانن۔ اوغان امن عمل نا بابت اوپارے کہ اوغان امن عمل مرے، ڈیہہ ٹی امن و سوگوی نا ہیت مرے نن اسہ ایلو تون تین پہ تینی سلابت و کمکاری ءِ برجاتخانن۔ کشمیر نا بابت شاہ محمود قریشی پارے کہ مقبوضہ جموں و کشمیر نا حالیت آتیا چین پاکستان نا موقف نا تائید و مخ تفی ءِ کرینے داڑآن جوانی اٹ اندازہ خلنگ مریک کہ ننا تعلقداریک اخس کڑمب ءُ۔ چین نا حالیت آک بھاز بدل مسنو چین داوخت آ دنیا نا ارٹ میکو بھلا زرگزران مسنے و ہرارفتار اٹ دا شونداری نا سفر ءِ برجاتخانے اومیت کننگ انگ ءِ کہ بروک آ منہ سال اٹی دا دنیا نا غٹ آن بھلا زرگزران نا وڑاٹ مون آ بریک۔ اوپارے کہ پاکستان و چین نا نیام اٹ گچین ہڑتوم آ کنڈآتا تعلقداری ساڑی ءِ نن داہروئی ءِ کہ نن تینا ہڑتوم آ کنڈآتا سیاسی تعلقداری تے ڈیہہ نا گچینی و سوگوی کن امر کاریم اٹ اتنگ کینہ۔ نن چین انا کمک اٹ تینا کشاری بشخ اٹی فی ایکڑ پیدوار ءِ ہمہ ودفنگ کینہ۔ نن چین آن فائدہ ہرفسا پاکستان اٹی صنعت کاری و انفراسٹرکچر ءِ ہمہ مون آ دننگ کینہ۔ اوپارے کہ نن چین اتون اواری اٹ اوغان امن عمل کون آ اسیجا مسخت آتے ٹی امر مون آ ہِننگ کینہ و علاقائی امن نا تغ ءِ امر پورو کننگ کینہ۔ نن پاک چین سنگتی ءِ ڈیہہ ٹی شونہالی نا کلہو اسے نا وڑاٹ مون آ اتنگ خوانہ و دا تین پہ تینی دورہ دا چرجوئی ٹی کمکار مریک۔ وزیر خارجہ پارے کہ 2021ء ٹی نن پاک چین سنگتی نا ہفتاد سالہ جشن ءِ پورو جم و جوش اٹ اڈتننگ نا عزم تخنہ۔
