بیجنگ۔ 17مارچ(اے پی پی) صدر مملکت ڈاکٹر عارف علوی چین نا وزیراعظم لی کی چیانگ تون اوڑدہی ٹی کورونادَین انا برخلاف چین اتون پورو یکجہتی و پاکستان نا کنڈآن مخ تفی نا درشانی ءِ کرینے۔ ہڑتوم آ راہشون تا نیام اٹ اوڑدہی بیجنگ نا گریٹ ہال اٹی مس۔ صدر مملکت داوخت آ پارے کہ پاکستان و چین ہر آزمائش آ پورو سلوک آ سنگت و آہنی برادرز ءُ ہرا مدام اسہ ایلو تون سلیسونو۔ ہڑتوم آ ملک آتا تعلقداریک تین پہ تینی پت و فائدہ تروک کمکاری آ مبنی ءُ۔ اوپارے کہ پاکستان چین دنیا ءِ پارینو کہ او بقائے باہمی و نیام تمپننگ آ یخین تخرہ۔ صدر مملکت پارے کہ پاکستان مدام مشکل وخت اٹی چین اتون تفینے و کورونا وائرس نا دَین اتون مون تننگ نا چیلنج اٹی ہم اونا مخ تفی ءِ برجاتخک۔ اوپارے کہ چین کورونا دین انا توننگ کن گچین گام گیج کرینے۔ داوخت آ چینی وزیراعظم صدر مملکت و اونا ڈل ءِ بخیر کرسا پارے کہ چین وپاکستان نا سنگتی وخت اتون پین سوگو مسنے۔ اوپارے کہ چین اٹی کورونا وائرس آن ودی مروک آ دَین آ وزیراعظٰم عمران خان و پاکستان نا حکومت چین اکن ہمدردی نا درشانی نا کلہو آتے مون تسر و دَین انا تالان مننگ آن دمدستی پد پاکستان چینءِ طبی امداد فراوان کرے۔ نن چین اٹی پاکستان نا خیر خواہی نا جوزہ غا منت واراُن۔ چینی وزیراعظم پارے کہ چین سمجھک کہ پاکستان اٹی ہم داسہ کورونا وائرس نا گڑاس کیس ظاہر مسنو ہرافتا رداٹ حکومت پاکستان گام گیج کننگ ءِ۔ ننے داوڑنا چیلنج آتون اسیجا وڑاٹ مون تننگ کن تینا کمکاری ءِ ودفنگ نا گرج ءِ۔ نن دا بابت پاکستان تون اواری اٹ کاریم کننگ خوانہ۔ اوپارے کہ انسانیت ءِ مون تروک دا چیلنج نا رداٹ جہانی کمکاری بھاز اہم ءِ۔ داوخت آ وزیر خارجہ شاہ محمود قریشی ، بنجائی وزیر ڈٹ بندی ، شونداری و اصلاحات اسد عمر، چین نا وزیر خارجہ ، چین اٹی پاکستانی سفیر و ایلو سینئر کمامدارآک ہم ساڑی ئسر۔
