کوئٹہ۔ 16مارچ(اے پی پی) کوئٹہ نا پنی آ معالج ڈاکٹر ریاض الدین پارینے کہ کورونا ساہ ہلنگ نا ناجوڑی نا سوب مروک آ پراسرار وائرس اسہ انسان آن ایلو انسان اٹ پترینگ انگ کیک ، ہنداخاطرآن کورونا وائرس آن بچنگ کن ہربندغ ءِ مرے کہ او ہر اسہ گھنٹہ غان پد تینا دُو و مون ءِ ضرور سلے، ہوٹل و بازار تا تیار کروک آ کنوئی آ گڑاتیان پاریز کیرو اُراغان پیش تمنگ نا وخت آ ماسک بینسا و دستانہ بینر۔ داخیال آتا درشانی ءِ او دوشنبے نادے آ‘‘اے پی پی’’ تون خصوصی گپ وتران کرسا کرے۔ ڈاکٹر ریاض الدین پارے کہ بلوچستان حکومت نا کنڈآن سرکاری دفتر و تعلیمی ادارہ غاتے ٹی چھٹی تیان پد شاریک بے گرج مچی و رش انگا جاگہ غاتیاہنپس انتئے کہ دا وائرس گنجان آبادی والا علاقہ غاتیا زیات جلہو کیک و وائرس نامون ءِ توننگ طبی و پاریزی اٹ مننگ کیک۔ اوپارے کہ شاریک کورونا وائرس تون مون تننگ کن پاڷ، خوائے، کیلا، کینو پین پین کنیر تانکہ وٹامنز آن جون اٹی پبی قوت مدافعت ودی مرے، ڈاکٹر ریاض الدین پارے کہ کورونا وائرس جہانی ءُ دین اس جوڑ مسنے ہنداخاطرآن ہر شاری ءِ مرے کہ او دا دین انا تالانی ءِ توننگ و تینا خاہوت و سنگت آتا رکھ اکن پاریزگری ءِ اختیار کیر و غٹ خلقت دوملفنگ و خمب ہلنگ آن بیدس اسلام و علیکم پاننگ ءِ رواج ایتر۔ اوپارے کہ کورونا وائرس نا بنااِڷ آن مریک و ولدا زہمی بندغ خش انگا جکہ ٹی اختہ مریک و اسہ ہفتہ غان پد ساہ ہلنگ اٹ مشکل مریک و دا وائرس نزلہ زکام ہم ودی کیک و کرار کرار آ پیچیدگی اختیار کرسا مریض ءِ مرک انا کنڈآ دیک ہنداخاطرآن الس پاریزگری اختیار کرسا تینا دوتے دے اٹی کیہی وار بارسینی ٹائزر و ہینڈ واش اٹ ضرور سلر ، وخت اس کہ نزلہ زکام نا دروشم اٹ اُراتیٹی مریر، داسہ دُن کہ مچ آ بلوچستان اٹی سرکاری دفتر و تعلیمی ادارہ غاک بند ءُ ہنداخاطرآن شاری بے گرج اُراتیان پیش تمنگ آن پاناد کیر و ہروڑنا ایمرجنسی نا حالیت اٹ اُراتیان پیشن ہِننگ نا وخت آ ماسک ضرور بینرو رش انگا جاگہ غاتیا ہنپس انتئے کہ کورونا وائرس نا مقابلہ ءِ بیرہ محکمہ جان جوڑی نا جاری کروک اصول و طبی و پاریزی اختیار کننگ آن ہی ممکن ءِ۔
