اسلام آباد۔ 16مارچ(اے پی پی) پارلیمانی سیکرٹری قومی جان جوڑی خذمت ریگولیشن اینڈ کوارڈینیشن نوشین حامد پارینے کہ حکومت وائرس ءِ تالان مننگ آن توننگ کن غٹ المی گام گیج آتے کننگ ءِ۔ نجی نیوزچینل تون گپ وتران کرسا اوپارے کہ حکومت کوروناوائرس نا بابت متحرک و تیار ءِ، الس ءِ ہم زیات چوکس مننگ نا گرج ءِ۔ اوپارے کہ پیشن نا ملک آتیان بروک آ بندغ آک تینے 14دے اسکان تخر۔ اومستی پارے کہ کوروناوائرس آن ملک انا باتی تے بچفنگ و توننگ کن وزارت جان جوڑی غٹ شاری و ہنکینی تے پارینے کہ او بے گرج سفر آن پاناد کیر۔ اوپارے کہ ایلو ملک آتیان پدی بروک آ بندغ آتے کن رکھی گام گیج چست کننگ انگ ءِ۔ اوپارے کہ جان جوڑی تون گنڈوک غٹ کمامدارآک اواری اٹ کاریم کننگ ءُ و بالی پٹ آتیا سکریننگ ہم کننگ انگ ءِ و ساڑی آ دے تیٹی پیشن نا ملک آتا سفر کروک آتے پاریزگری نا پیروی ءِ کروئی مریک۔ اومستی پارے کہ دا غٹ گام گیج آتا مسخت کورونا وائرس نا تالانی نا مون ءِ توننگ ناءِ۔ نوشین حامد پارے کہ تھرموسکینرز مسافر آتا سکریننگ کن غٹ بھلا ہن و بر کسر تیا خلنگانے و نن مسافر آتا ریکارڈ ہم تخنگ اُن۔ اوپارے کہ پاکستان اٹی رپورٹ مروک آ زیات تر کیس آتا کچ ایران، عراق و شام آن سفر کرسا پدی بروک آتیان ءِ۔ اومستی پارے کہ دا ملک آتیان حکومت غٹ 14000مسافر آتا معلومداری دوئی کرینے۔ سیکرٹری جان جوڑی پارے کہ حکومت سیالکوٹ، اسلام آباد، کراچی، ملتان، فیصل آبادو لاہور نا غٹ بھلا لیبارٹری تے تشخیصی کٹ فراوان کننگانے و دا لیبز آک جوان وڑاٹ فعال ءُ و تروک آ ایس او پیز نا رداٹ کاریم کننگ ءُ۔ اومستی پارے کہ وائرس نا علامت ظاہر مننگ نا دروشم اٹ دمدستی وڑاٹ ہیلپ لائن آرابطہ کننگے و ہر بندغ ماسک بینے۔
