اسلام آباد۔ 16مارچ(اے پی پی) وزیراعظم نا خصوصی کمکار قومی جان جوڑی ڈاکٹر ظفر مرزا پارینے کہ قومی چیلنج آتون مون تننگ کن پورو تیار اُن، 14لیبارٹری تیٹی کورونا وائرس نا ٹیسٹ نا آسراتی فراوان کننگانے، بنجا، صوبہ غاک و وزارت جان جوڑی نا غٹ تعلقدار ادارہ غاک ہلہلہ ئی بنداو تیا المی گام گیج آتے پک کننگ ءُ، الس نا رکھ اکن مچ آ ملک اٹی وزارت نا عملہ 24گھنٹہ کاریم کننگ ءُ۔ داخیال آتا درشانی ءِ او دوشنبے نادے آ تینا کماشی ٹی ایمر جنسی کور پڑک نا دیوان اٹی گپ وتران کرسا کرے۔ دیوان اٹی این آئی ایچ نا ایگزیکٹو ڈائریکٹر میجر جنرل عامر اکرام و پاک فوج انا نمائندہ غاک ساڑی ئسر۔ دیوان اٹی بدل مروک آحالیت آتا جاچ ءِ ہلنگا۔ دیوان اٹی گپ وتران کرسا ڈاکٹر ظفر مرزا پارے کہ کورونا وائرس نا قومی چیلنج اتون مون تننگ کن تیار اُن۔ 14لیبارٹریز اٹی کورونا وائرس نا ٹیسٹ نا آسراتی فراوان کننگ انگ ءِ، حکومت تینا زمواری تے جوان وڑاٹ پورو کننگ ءِ۔ اوپارے کہ بنجا، صوبہ و وزارت جان جوڑی نا غٹ تعلقدار ادارہ غاک ہلہلہ ئی بنداو تیا المی گام گیج آتے پک کننگ ءُ۔ الس نا رکھ اکن مچ آ ملک اٹی وزارت جان جوڑی نا عملہ 24گھنٹہ کاریم کننگ ءُ۔ قومی یک جہتی اتون قومی ایکشن پلان آ عملدرآمد کننگ انگ ءِ۔ اوپارے کہ پیشن نا ملک آن بروک آ جہاز آتے لاہور اسلام آبادو کراچی اسکان محدود کننگانے۔ لاہور، اسلام آبادو کراچی بالی پٹ آتیا سکریننگ نا نظام ءِ پین گچین و سوگو کننگانے۔ اوپارے کہ حکومت پاکستان و جہانی ادارہ جان جوڑی نا جاری کروک پاریزگری آ عمل کیر، ساڑی آدے تیٹی اگہ کس اس پیشن نا ملک آ سفر کرینے، جکہ اِڷ،ساہ ہلنگ نا تکلیف نا دروشم اٹ اُراٹی رہینگسا یا ڈاکٹر یا وزارت جان جوڑی نا ہیلپ لائن 1166آ رابطہ کیر۔ اوپارے کہ ببو نن غٹ اواری اٹ کوروناوائرس نا تالانی ءِ توننگ نا عہد کین و یقینا دانا مون ءِ تورنہ۔ وزارت جان جوڑی، صوبائی حکومت و تعلقدار ادارہ غاتے کورونا وائرس تون مون تننگ کن ہائی الرٹ ءُ و جان جوڑ پاکستان کن کرونا غان خلوئی اف اوڑتون جنگ تروئی ءِ۔
