اسلام آباد۔ 16مارچ(اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ پاکستان اٹی کورونا وائرس آن زہمی مروک آبندغ آتا کچ 53ءِ و دا کچ ایلو ملک آتا مقابلہ ٹی بے کچ کم ءِ۔ نجی ٹی وی چینل اے آر وائی نا پروگرام تون گپ وتران کرسا اوپارے کہ مچ آ دنیا ٹی کورونا وائرس آن زہمی مروک آ بندغ آتا کچ ہزار آتیٹی ءِ وخت اس کہ ننا داڑے دا کچ بے کچ کم ءِ۔ اوپارے کہ کورونا وائرس تون مون تننگ کن نن غٹ تینا زمواری تے پورو کین، بنجائی حکومت و صوبائی حکومت تینا تینا زمواری تے پورو کننگ ءُ۔ داسہ شاریک ہم پاریزگری اختیار کیر۔ اِرادے مہالو نیشنل سیکورٹی نا دیوان اٹی کوروناوائرس نا بارواٹی اہم فیصلہ کننگانے۔ ڈاکٹر ظفر مرزا پارے کہ ننا ہیلتھ پروفیشنل اتون گنڈوک بندغ آک ہروڑنا حالیت آتے ٹی فرنٹ لائن آٹی ءُ و حوال آتا رداٹ حکومت پنجاب بھاز زیات کٹس ہسپتال آتیا سرکرینے۔ اگہ کمتی اس مسنے تو اودے پورو کننگک۔ اوپارے کہ سارک ملک آتا دیوان اٹی کورونا وائرس تون مون تننگ نا بابت اوپارے کہ کشمیر اٹی داخہ بھلو لاک ڈاؤن اسے کشمیر نا لحاظ اٹ ننے بھاز گڑتی ءِ، کشمیر نا حالیت آتے ہم مون آتخنگے و لاک ڈاؤن ءِ چٹفنگے و ہموڑے دمدستی وڑاٹ میڈیکل نا آسراتی تے سرکننگے۔
