کورونا وائرس نا دَین نا ڈٹ کر مقابلہ ءِ کینہ، قومی سلامتی کمیٹی نا دیوان اس بٹنگ انگانے
اسلام آباد۔ 13مارچ (اے پی پی) بنجائی وزیر تعلیم شفقت محمود پارینے کہ قوم ءِ باور کرفنہ کہ کورونا وائرس نا دَین نا ڈٹ کر مقابلہ ءِ کینہ و مچ آ قوم اتون اوار چلینگسا کانہ۔ قومی سلامتی کمیٹی نا دیوان اس بٹنگ انگانے، داٹی غٹ صوبہ غاتے ہم بٹنگ انگانے ہراٹی دا بابت اہم فیصلہ کننگک، ہر ملک دا دَین نا برخلاف تینا وڑاٹ گام گیج ہرفنگ ءِ۔ جمعہ نادے آ قومی اسمبلی ٹی کورونا وائرس نا بابت آن چست کروک آ اعتراضی ٹک انا ورندی ءِ ترسا بنجائی وزیر شفقت محمود پارے کہ واقعی بھاز گڑتی نا حالیت اسے۔ حکومت دا حالیت آتیان معلومدار ءِ و گام گیج چست کننگ انگءِ۔ پاکستان اٹی داوخت اسکان 22کیس رپورٹ مسنے۔ اوپارے کہ ایران اٹی کرونا وائرس مون آ بننگ آن پد تفتان بارڈر ءِ بند کننگا، سکریننگ نا عمل بناکرے، بالی پٹ آتیا 10 لکھ خلقت نا سکریننگ ءِ کننگا۔ ہسپتال آتے ٹی کٹس فروان کننگا۔ اوپارے کہ خوف و بھیم نا چاگڑدءِ تالان کننگپ۔ نیشنل سیکورٹی کمیٹی نا دیوان اس مننگ ءِ۔ غٹ صوبہ غاک بشخ ہلنگ ءُ۔ مچ آ حالیت آتا جاچ ءِ ہلنگک۔ اوپارے کہ امریکہ ٹی غٹ اسکول و یونیورسٹی تے بند کننگ انگءِ۔ برطانیہ ٹی اسہ اسکول و ادارہ اسے ہم بند کپننگ انگءِ۔ نیشنل سیکورٹی کمیٹی نا دیوان آن پد گام گیج آک پید وار مریرہ۔ بنجائی وزیر شفقت محمود پارے کہ فاضل باسک دا معاملہ غا سیاست کننگ نا بناءِ کرینے۔ ووہان اٹی ہراتم دا ویل بس تو پاکستانی طالب علم آتے پدی اتنگ نا معاملہ درپیش مس تو چینی حکومت ننے پارے کہ داسہ طالب علم آتے ہنداڑے رہینگ انگ کن ہلنگے۔ داجوان ءُ فیصلہ اس ئس کہ او طالب علم آتے پدی اتنگتو۔ داسہ چین اتون اوار ووہان اٹی کورونا وائرس نا کیس آتے ٹی کمتی بننگ ءِ۔ اوپارے کہ نن نیشنل سیکورٹی کمیٹی نا دیوان اس بٹنگانن اگہ اسہ دے اس صبر کننگاکہ تو جوان ئس۔ ہر ملک تینا وڑاٹ دا معاملہ غا گام گیج ہرفیکہ۔ نن باور کرفنہ کہ دا دَین نا ڈٹ کر مقابلہ ءِ کینہ و مچ آ قوم اتون اوار چلینگینہ۔
