کرونا وائرس نا بابت آن سنجیدہ گام گیج آتا گرج ءِ
اسلام آباد۔ 13مارچ (اے پی پی) مسکوہی وزیراعظم و مسلم لیگ (ن) نا مرکزی راہشون شاہد خاقان عباسی پارینے کہ کورونا وائرس مچ آ دنیاءِ تینا پلویڑ اٹی ہلکونے، داڑآن زرگزران زہمی مننگ ءِ، دانا بابت آن سنجیدہ گام گیج آتا گرج ءِ، دا معاملہ غا ہڑتوم آ ایوان تا اسیجا دیوان اس بٹنگ انگے، حکومت جامع حکمت عملی اس مون آ اتے۔ جمعہ نادے آ قومی اسمبلی ٹی شاہد خاقان عباسی اعتراضی ٹک آ پارے کہ کورونا وائرس ملک انا اہم ءُ ویل اسے۔ بدبختی اٹ دا بابت آن ہچ ءُ جامع پالیسی اس مون آ بننگ کتنے۔ صوبہ غاک گڑاس کاریم کننگ ءُ، ننے خوشی ءِ کہ وزیراعظم ہاؤس دانا نوٹسءِ ہلکونے و قومی سلامتی کمیٹی نا دیوان اس بٹنگانے۔ کورونا وائرس مچ آ دنیا ءِ پلویڑ اٹی ہلکونے داڑآن زرگزران ہم زہمی مننگ ءِ، دا بابت آن بیرہ گڑتی نا درشانی کافی اف، نن پوائنٹ سکورننگ کپننگ اُن، داڑکن سنجیدہ گام گیج آتا گرج ءِ۔ پاکستان دنیا نا بھلا ملک آتیان اسٹ ءِ، ولے ننا ہچ ءُ پالیسی اس اف۔ دا بیرہ حکومت و اپوزیشن نا معاملہ اف۔ مچ آ ملک اٹی ایشوءِ۔ نن داڑآ چکار ی نوٹس اس جمع کرفیسن ولے اوہم ایجنڈا غا بتو کرونا وائرس نا معاملہ غا ہڑتوم آ ایوان تا فی الفور اسیجا دیوان اس بٹنگ انگے، حکومت ءِ کورونا وائرس نا بابت آن جامع حکمت عملی اس بایدے مون آ اتنگے۔ اوپارے کہ اگہ کینیڈین وزیراعظم نا اُرائی کورونا وائرس نا گواچی مننگ کیک، دا ناجوڑی دمدستی ظاہر مفک، ممکن ءِ کہ دا دیوان اٹی ہم کس اس دانا گواچی مرے۔ شاہد خاقان عباسی پارے کہ عمرہ بند مسنے۔ ایران اٹی 10 ہزار کیس مون آ بسنو۔ سیاسی بیرہلنگ انا جاگہ غا نن واری اٹ دا ویل اتون مون ایتن۔
