پاکستان قطرا تون برادرانہ ہڑتوم آ کنڈآتا تعلقداری تے سوگو سیاسی و زرگزرانی شریداری ٹی بدل کننگ کن پرعزم ءِ
اسلام آباد۔ 13مارچ(اے پی پی) صدر مملکت ڈاکٹر عارف علوی پارینے کہ پاکستان قطر اتون برادرانہ ہڑتوم آ کنڈآتا تعلقداری تے سوگو سیاسی و زرگزرانی شریداری ٹی بدل کننگ کن پرعزم ءِ، قطر پاکستان اٹی زرکاری نا مون آ بروک آ وارخواہی تیان فائدہ ہرفنگ کیک۔ ایوان صدر آن جاری بیان نا رداٹ صدر مملکت داخیال آتا درشانی ءِ قطر انا دزکش مروک آ سفیر صقر بن مبارک المنصوری تون گپ وتران کرسا کرے ہراجمعہ نادے آ داڑے اوڑتون سپاروکی اوڑدہی کرے۔ صدر مملکت پارے کہ پاکستان قطر اتون برادرانہ ہڑتوم آ کنڈآتا تعلقداری تے اسہ سوگو سیاسی و زرگزرانی شریداری ٹی بدل کننگ کن پرعزم ءِ، کراچی و حمد بندرگاہ تا نیام اٹ براہ راست رابطہ و پاکستان کن قطری فوڈ مارکیٹ اسکان رسینگ آن پد تین پہ تینی واپار اٹی نمان گچینی بسنے۔ اوپارے کہ قطر پاکستان اٹی زرکاری نا تالان مروک آ وارخواہی تیان فائدہ ہرفنگ کیک۔ صدر مملکت اوغان امن مذاکرات نا مہمانداری و کمکاری ٹی قطر انا اہم کڑد انا ستاءِ کرسا دا اومیت نا درشانی ءِ کرے کہ غٹ کڑدہ غاک دا معاہدہ نا پاسداری ءِ کیرہ و اوغانستان اٹی امن نا تغ ءِ حقیقت اٹ بدل کینہ۔ صدر مملکت قطری سفیر ءِ بھارتی مقبوضہ جموں و کشمیر اٹی انسانی حق آتا لتاڑ آن ہم معلومدار کرے و او آئی سی تون اوار جہانی برداری آ زور شاغا کہ او تنازعہ کشمیر نا پرامن ایسری اتون اوار اوار بھارت اٹی اقلیت آتا رکھ اٹی ہم تینا کڑد ءِ ادا کیر۔ صدر مملکت دزکش مروک آ سفیر ءِ پاکستان اٹی تینا زمواری تے پورو کننگ آ مبارکباد پیش کرے و ہڑتوم آ ایلم ملک آتا نیام اٹ ہڑتوم آ کنڈآتا تعلقداری تیٹی گچینی اتنگ کن اونا کوشست آتا ستاءِ کرے۔
