کوئٹہ۔ 12 مارچ (اے پی پی) وزیراعلیٰ بلوچستان جام کمال خان نا کماشی ٹی اڈ ہلوک آ دیوان اٹی بنجائی پی ایس ڈی پی ٹی اوار برجا ڈٹ آتا پیش رفت نا جاچ ءِ ہلنگا ہرافتے ٹی مواصلات، دیر، بجلی، صنعت، ہائر ایجوکیشن و ایلو سیکٹر آتا ڈٹ آک اوار ءُ و فیصلہ کننگاکہ بنجائی حکومت آن برجا ڈٹ آتا پوروی کن زیات آن زیات فنڈ جاری کننگ آ زور شاغنگک تانکہ دا ڈٹ آتا فائدہ غاتیان الس فائدہ ہرفنگ کے۔ دیوان اٹی دا ہیت آن امنا کننگاکہ بنجائی پی ایس ڈی پی ٹی بلوچستان نا ڈٹ آتے تو اوار کننگک ولے اوفتے کن کچ اٹ فنڈ جتا مریک ہرافتے آن نئے بیرہ ڈٹ آک پدتمرہ بلکن اوفتا خڑچ اٹی ہم ودکی مریک، دیوان اٹی دا ہیت آہم گڑتی ظاہر کننگاکہ ایکنک آن منظوری آن پد ہم چندی ڈٹ آک ہندن ءُ ہرافتیا کاریم نا بناءِ کننگتنے، وزیراعلیٰ پارت کرے کہ بنجائی ڈٹ آتا پیش رفت نا پورو سرجم تیار کننگے ہرافتے گچین وڑاٹ بنجائی حکومت تون چست کننگک، دیوان اٹی بھلا خڑچ انا ڈٹ آتے کن پروجیکٹ ڈائریکٹر نا تعیناتی نا وڑوڈول ءِ گچین کننگ و دا بابت آن ایڈیشنل چیف سیکرٹری ڈٹ بندی و شونداری نا کماشی ٹی ٹیکنیکل سلیکشن بورڈ انا جوڑ کننگ نا فیصلہ کننگا۔ دیوان اٹی صوبہ ٹی انفراسٹرکچر ڈویلپمنٹ بورڈ انا ٹہیفنگ نا ہم جاچ ءِ ہلنگا و پی اینڈ ڈی ءِ سلاہ و سوج پیش کننگ نا پارت کننگا، دیوان اٹی ڈٹ آتے ٹی کنٹیلیجنسی نا مد اٹ مروک آ خڑچ آتے کم آن کم کہول آ تخنگ نا حکمت عملی اس تینا کننگ نا فیصلہ ہم کننگا۔ ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری خزانہ نور الحق بلوچ، و ایلو تعلقدار کمامدارآک دیوان اٹی ساڑی ئسر۔
