کوئٹہ۔ 12مارچ (اے پی پی) بلوچستان اٹی کورونا وائرس ناگڑتی نا رداٹ غٹ سرکاری و نجی تعلیمی ادارہ غاتے 31مارچ اسکان بند کننگ نا فیصلہ کننگانے داکان مست یکم مارچ آن 15مارچ تعلیمی ادارہ غاتے بند کننگ نا پرمان جاری کننگاسس حالیت آتے ہرسا چھٹی تیٹی ودکی کننگانے، داہیت ءِ پنچ شنبے نادے آ صوبائی وزیر تعلیم سردار یار محمد رند پریس کانفرنس آن تران کرسا کرے، او پارے کہ صوبائی حکومت محکمہ جان جوڑی تون سلابت آن پد صوبہ نا غٹ سرکاری و نجی تعلیمی ادارہ غاتے 31مارچ اسکان ملپننگ نا فیصلہ کرینے، تعلیمی ادارہ غاتے ملنگ نا بروک آ فیصلہ ءِ 27 مارچ آ کننگک، اوپارے کہ صوبہ نا دینی مدرسہ غاتے ٹی ہم چھٹی کن تعلقدار مدرسہ غاتا مہتمم و کمامدارآتون ہیت وگپ کننگ اُن، پریس کانفرنس اٹی پاننگاکہ صوبہ ٹی برجا میٹرک نا امتحان تا چرجوئی ءِ ہم توننگانے ہرافتا بروک آ تاریخ نا فیصلہ ءِ 27 مارچ آ کننگک وزیرتعلیم سردار یار محمد رند پارے کہ تعلیمی ادارہ غاتے بند کننگ نا دا فیصلہ ءِ محکمہ جان جوڑی و وزیراعلیٰ بلوچستان تون سلابت آن پد ہلنگانے۔
