کوئٹہ نا الس بھلو کساس اسے نا کوئٹہ پیکج آن شار انا گچینی نابابت آن اومیت آک گنڈوک ءُ، و دا ڈٹ شار انا زیبائی و شاری آسراتی تا فراوانی نا بابت آن اہمیت تخک، وزیراعلیٰ بلوچستان جام کمال خان

کوئٹہ۔ 12 مارچ(اے پی پی) وزیراعلیٰ بلوچستان جام کمال خان کوئٹہ شونداری پیکج اٹی اوار سڑک آتا جوڑ کننگ نا ڈٹ آتیا عملدرآمد اٹ تل ول آ ترندی نا درشانی ءِ کرسا پارینے کہ ڈٹ آتے ٹی بے گرج تل و ول، حکومت نا فنڈ ز و وخت انا زیان اسل امنا کپنہ، داخیال آتا درشانی ءِ او کوئٹہ شونداری پیکج نا پیش رفت نا جاچ دیوان اٹی کرے، ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری خزانہ نور الحق بلوچ و ایلو تعلقدار کمامدار آک دیوان اٹی ساڑی ئسر وخت اس کہ ڈٹ انا پروجیکٹ ڈائریکٹر کمشنر کوئٹہ عثمان علی خان دیوان ءِ حوال تس، وزیراعلیٰ پارے کہ کوئٹہ نا الس ءِ بھلو کساس اسے نا کوئٹہ پیکج آن شار انا گچینی نا بابت آن اومیت آک گنڈوک ءُ و دا ڈٹ شار انا زیبائی و شاری آسراتی تا فراوانی نا بابت اہمیت تخک، وزیراعلیٰ پارے کہ کوئٹہ شونداری پیکج نا پروکیورمنٹ کمیٹی نا باسک آتا نیام اٹ عدم ہم گرنچی و بے سوب اعتراض آتا سوب ڈٹ پدتموک ءُ ہرانا سوب ڈٹ انا خڑچ اٹی ودکی ہم مننگ کیک، ہنداخاطرآن کمیٹی غٹ باندات آتا اول سر آن جاچ ءِ ہلسا دمدستی وڑاٹ ٹینڈرنگ پراسس ءِ پورو کے، وزیراعلیٰ ڈٹ آتے ٹی کنسلٹنسی و کنٹیلیجنسی خڑچ آتے ہم غیر متناسب گوندسا پارینے کہ کنسلٹنسی فرم آتا کنڈآن تینا فائدہ ٹی ڈٹ آتا ڈیزائن اٹی بے گرج بدلی کرسا اوفتا کساس ءِ ودفنگک ہراڑآن کنسلٹنسی فیس اٹی ودکی مریک و ڈٹ آک ہم پد تمرہ۔ اوپیدوار لوز آتے ٹی پارے کہ اسہ ادارہ اسے ہم الس نا وسیلہ غاتے پُلنگ نا موکل تفننگک۔ وزیراعلیٰ پارت کرے کہ کوئٹہ شونداری پیکج آ عملدرآمد اٹ تاخیر نا سوب آتا دمدستی وڑاٹ چٹفسا ڈٹ آتیا عملدرآمد نا بناءِ کننگے۔