اسلام آباد۔ 12مارچ(اے پی پی) جہانی ادارہ جان جوڑی کوروناوائرس نا تالانی و شدت آ گڑتی نا درشانی ءِ کرسا پارینے کہ کوروناوائرس تون مون تننگ کن ایمرجنسی رسپانس ءِ ودفر، غٹ ملک آک تینا ہسپتال آتے تیار تخر، غٹ ملک آک تینا ہیلتھ ورکرز آتے ٹریننگ ایتر، کورونا وائرس نا ہر مریض نا درمان ءِ برجاتخر، کوروناوائرس آن زہمی بندغ تون رابطہ ٹی مروک آ ہر بندغ نا ڈس و نشان ءِ خلنگے۔جہانی ادارہ جان جوڑی نا کمامدارآک پاریر کہ کورونا بیرہ السی جان جوڑی نا تنکی اف ، ہر بشخ ءِ زہمی کیک۔ ہر سیکٹر و ہر بندغ کورونا وائرس تون مون تننگ اٹ بشخ ہلیر۔ کورونا وائرس نا90 درسد کیس بیرہ 4 ملک آتے ٹی ءُ۔ اوپاریر کہ 57 ملک آتے ٹی 10یا اوکان کم کیس رپورٹ مس۔ داوخت اسکان 114 ملک آتے ٹی کورونا وائرس نا اسہ لکھ 18 ہزار کیس رپورٹ مسنے۔ کمامدارآتا رداٹ چین و سویلی کوریا ٹی کورونا وائرس نا کیس آتے ٹی ترندی اٹ کمتی بننگ ءِ۔
