اسلام آباد۔ 12مارچ(اے پی پی) وزیر موسمیاتی بدلی زرتاج گل پارینے کہ ملک انا پدسلوک آ علاقہ غاتا شونداری و بھلا شارتے زیبدار جوڑ کننگ پاکستان تحریک انصاف نا اولیت آتے ٹی اوار ءِ ۔ ریڈیو کرنٹ افیئر نا پروگرام تون گپ وتران کرسا اوپارے کہ ساڑی حکومت نا ماسٹر ہاؤسنگ پلان اسلام آباد، کراچی، لاہور، پشاور و فیصل آباد تون اوار ملک انا بھلا شارتیا تالان ءِ۔ اومستی پارے کہ نن بنجائی دارالحکومت آن ہاؤسنگ پلان نا بناءِ کینہ انتئے کہ دنیا نا زیبا انگا دارالحکومت آتیان اسٹ ءِ ، بدبختی دادے کہ مستین اٹی ہاؤسنگ سیکٹر نا ماسٹر پلان بے سہب مسنے انتئے کہ مافیا کانود آن ایڑتر مرسا کاریم کریرہ۔ اومستی پارے کہ ہر کالونی ٹی گرین بیلٹ، پارکس و ایلو آسراتیک مریر ولے مافیاک آسراتی تا فراوانی نا جاگہ غا پیسہ کٹیا کننگ اٹ اختہ ئسر۔ زرتاج گل پارے کہ بھاز انگا پنی آ جوڑ کروک، آرائش کار و انجینئر داچرجوئی ٹی جوڑ کمیٹی نا باسک ءُ و بنجائی دارالحکومت آن پد دا پروگرام ءِ ایلو شارتیٹی ہم بناکننگک۔ اوپارے کہ ملک انا نیزگار الس وزیراعظم عمران خان نا است آن بھاز خڑک ءُ۔ تحریک انصاف نا حکومت نا قومی ایجنڈا احساس پروگرام نا رداٹ نیزگاری نا چٹفنگ ، ورناتے جان جوڑی و تعلیم نا فراوانی ءِ پک کننگ ناءِ۔ اومستی پارے کہ ساڑی حکومت نا 1.5 سال انا دور اٹی مثبت رجحانک مون آ بننگ نا بناءِ کرینو۔
