اسلام آباد۔ 12مارچ(اے پی پی) وزیر مملکت پارلیمانی امور علی محمد خان پارینے کہ پنجاب نا پدسلوک آ علاقہ نا شونداری واودے ترند رفتار بنداوتیا بھلا شارتیانبار بریبر آسراتی تا فراوانی پی ٹی آئی حکومت نا اولیت آتے ٹی اوارءِ۔ نجی ٹی وی چینل نا پروگرام تون گپ وتران کرسا اوپارے کہ پاکستان تحریک انصاف نا حکومت السی راجی آسراتی کن داوڑنا گام گیج کرسا کرینے ہرافتے مستین نا دورحکومت آتے ٹی گوجالنگاسس۔ و پی ٹی آئی نا حکومت وڈی خوری ءِ ماس کش کننگ کن پرعزم ءِ۔ علی محمد خان چندی بشخ آتے ٹی جامع اصلاحات درستی راستی کرفسا اسہ پوسکن ءُ مثال اس قائم کننگانے و سویلی پنجاب نا جوڑ کننگ آن دا علاقہ نا الس نا دیرینہ ویل آک ہم ایسر مریرہ ۔ اومستی پارے کہ پاکستان تحریک انصاف نا حکومت عمران خان نا متحرک سرکڑدہ ئی ٹی صوبہ اس جوڑ کننگ کن اسمبلی ٹی بل اس پیش کننگ نا فیصلہ کرینے ہرا دا عزم انا پوروی نا کنڈآ اولیکو گام مریک و ہرا سویلی پنجاب نا الس تون پی ٹی آئی نا حکومت نا کروک آ وعدہ اس ئس۔ اوپارے کہ مسکوہی حکومت آک بیرہ لاہور شار و اونا ایب وکیب انا شونداری آ چکار کریر وخت اس کہ سویلی پنجاب نا الس تینا حق آن محروم ئسر انتئے کہ اوفتیا ہچ اس خڑچ کننگتو۔ اوپارے کہ ای دانا پوروی کن ہچ ءُ ٹائم فریم ورک اس تننگ کپرہ، انتئے کہ دا رداٹ کانود جوڑ کننگ اٹ وخت لگک ، ولے اومیت ءِ کہ اسہ سیاسی جماعت اس ہم پوسکن آ صوبہ نا بل انا مخالفت ءِ کپک۔
