اسلام آباد۔ 12مارچ(اے پی پی) اسپیکر قومی اسمبلی اسد قیصر پارینے کہ بدبختی اٹ مستین اٹی کشاری بشخ ءِ گوجالنگا ہرانا سوب آن اسہ کشاری ملک اس مننگ آن پد ہم کشاری بشخ زبوں حالی نا گواچی مس، پارلیمنٹ کشارگر آتا توار مریک، نن پالیسی جوڑ کننگ ڈٹ بندی تون اوار کشاری بشخ انا شونداری کن سلاہ و سوج مرتب کرسا حکومت نا حوالہ کینہ ہرافتیا عملدرآمد کننگ تعلقدار وزارت نا زمواری مریک۔ پنچ شنبے نادے آ داڑے ہندی ہوٹل اٹی کشت وکشار آ قومی مکالمہ نا سرحال آ اڈ ہلوک آ کانفرنس نا بنائی دیوان اٹی خطبہ استقبالیہ پیش کرسا اسپیکر قومی اسمبلی اسد قیصر صدر پاکستان ڈاکٹر عارف علوی یونیورسٹی تا پولکار آتون اوار غٹ مندوبین تا منت واری ءِ ہرفسا پارے کہ پاکستان نا شونداری کن کشاری شونداری المی ءِ۔ ملک انا شونداری و فوڈ سیکورٹی کن کشت وکشار نا کڑد بے کچ اہم ءِ۔ اوپارے کہ مستین اٹی دا بشخ ءِ گوجالنگا و داٹی زرکاری کننگتو۔ نن دا معاملہ غا شرہ کرسا بنداوی سوب آتے ہُننگ خوانہ کہ پاکستان اسہ کشاری ءُ ملک اس مننگ آن پد ہم ہدف آتے انت اکن دوئی کننگ کتو۔ نن پارلیمنٹ نا کشت وکشار کمیٹی ءِ داخاطرآن جوڑ کرینن تانکہ کشارگر آتے اوفتا روا حق تننگ مرے۔ دا کمیٹی بزغر آتا شونداری شونہالی، پالیسی جوڑ کننگ و ڈٹ بندی نا بابت سلاہ و سوج مرتب کیک۔ اوپارے کہ اولیکو وار ملکی تاریخ اٹی کشت وکشار آ قومی مکالمہ مننگ ءِ۔ نن بزغر آتا توار مرینہ و غٹ بنداوی سوب و چیلنج آتا جاچ ءِ ہلینہ۔ اوبنجائی وزیر نیشنل فوڈ سیکورٹی خسرو بختیار ءِ مخاطب کرسا پارے کہ ننا کاریم سلاہ و سوج مرتب کرسا نے تروئی ءِ و اوفتیا عملدرآمد ءِ نے پک کروئی ءِ اوپارے کہ نن اواری اٹ ملک انا شونداری و شونہالی کن کاریم کینہ۔
