اسلام آباد۔ 12مارچ(اے پی پی) صدر مملکت ڈاکٹر عارف علوی پارینے کہ خور انا رکھ قومی سلامتی تون گنڈوک ءِ، کشاری بشخ اٹی پوسکن آ پٹ وپول، انفارمیشن ٹیکنالوجی و مصنوعی ذہانت نا کاریم اٹ اتنگ آن فی ایکڑ پیدوار اٹی ودکی کننگ مریک، پیدواری خڑچ انا ودنگ آن کشاری بشخ زہمی مسنے، کشاری پٹ وپول ءِ کشارگر آتسکان سرکننگ آن بیدس حقی بھرم تے دوئی کننگ مفک، ننا کشاری پیدوار انت اکن کم مس، ننے دابابت مستین نا ردینک آتیان سبخ ہلوئی مریک۔ داخیال آتا درشانی ءِ او پنچ شنبے نادے آ قومی اسمبلی سیکرٹریٹ نا کنڈآن کشت وکشار آ قومی مکالمہ نا بنائی دود آن تران کرسا کرے۔ دود اٹی اسپیکر قومی اسملبی اسد قیصر ، بنجائی وزیر آک، پارلیمنٹ نا باسک آک و ایلو تعلقدار بندغ آک ساڑی ئسر۔ صدر مملکت پارے کہ اسپیکر اسد قیصر ءِ کشت وکشار آ پارلیمانی کمیٹی اس جوڑ کننگ آ مبارکباد پیش کینہ۔ کشت وکشار پاکستان نا مخ انا ملی ئس و ارے ولے داکان پد ہم نن مہارت ہلینہ تو اوٹی ننا ہچ ءُ غلطی اس اف ہراڑآن نن بایدے سبخ اس ہیل کین۔ مستین نا ردینک آتیان ننے ہیل کروئی مریک۔ کشت وکشار ننا قومی زرگزران نا معاملہ ءِ ، ہراقومک تینٹ سیکورٹی نا خیال ءِ تخپسہ او فریشان مریرہ۔ 18.5 درسد آبادی نا تعلق کشت وکشار تون ءِ۔ پیدواری خڑچ ودنگ آن کشت وکشار نا بشخ زہمی مسنے۔ پدریسہ ننا فی ایکڑ پیدوار کم مسنے۔ زمانہ بدل مننگ ءِ۔ نن سڑک آتا بابت شون ہلکن۔ بزغر آک تینا اجناس آتے اسٹور کننگ کپسہ۔ داکنڈآ چکارکروئی مریک۔ صدر مملکت پارے کہ کنا باوہ نا 200آن دونیم سد ایکڑ ڈغار گھاروٹی ئسر ہراتم او ہمونگیا ہناٹہ تو پیڑ انا کیرغ آن چارپائی اس شاغسا خاچاٹہ او کنے داسکان یات بریک۔ اوپارے کہ اگہ کل پیداوار نا 5 درسد بزغر نا نسخان مرے تو او بھاز زہمی مریک۔ ہنداوڑ فشریز اٹی نسخان مسکہ۔ ولدا سرد خانہ جوڑ کننگا و اوفتا ویل ایسر مس۔ کشت وکشار دیر، دے، کرم کش دوائی و کھد آن بیدس چلینگ انگ کپک۔ دیر انا جوان کاریم اٹ اتنگ داٹی بے حد اہمیت تخک ہنداخاطرآن ننے فلڈاری گیشن آن سپر نکل اری گیشن نا کنڈآ ہنوئی مریک۔ دیر انا بچت و گچین کاریم اٹ اتنگ آن بیدس ویل ایسر مفک۔ دنیا ٹی ڈرپ اری گیشن نا کاریم اٹ اتنگ آن ننے آن بھاز انگا ملک آک مون آٹو۔اوپارے کہ دریائے سندھ انا تہذیب دنیا نا متکن آ تہذیب ءِ۔ اوپارے کہ دریاتا کنارہ غان چُر تا کشنگ نا نظام شون ہلکونے۔ ننے دا کنڈآ ہم چکار کروئی مریک۔ اودا بابت آن پٹ وپول آ چکار کننگ نا گرج آ زور شاغسا پارے کہ کرپاس نا بیچ آ بھاز کاریم کننگ نا گرج ءِ۔ اوپارے کہ کرپاس اٹی کاریم اٹ اتوک آ کرم کش دوائی و سیڈ ڈویلپمنٹ آ چکار کروئی مریک۔ صدر ممملکت پارے کہ کشت وکشار اٹی مصنوعی ذہانت و انٹرنیٹ نا بشخ انا اہمیت ودانے۔ دنیا ٹی آبپاشی و ایلو کشاری باندات آتے ٹی روبوٹ ءِ ہم کاریم اٹ اتنگ انگ ءِ۔ داکنڈآ چکار کرسا ہم نن تینا کشاری لائخی تیٹی ودکی کننگ کینہ۔ داڑآن نن کشاری لائخی ٹی ودکی کننگ کینہ۔ اوپارے کہ حکومت گچین ءُ فیصلہ کرینے، گنڈیری نا فصل انا گچینی جوان ءُ ہیت اسے۔ ننے نقد آور فصل آتیا ہم چکار کروئی مریک۔ اوپارے کہ زیتون کن پاکستان جوان ءُ جاگہ اسے۔ داڑآن نن تینا برآمد آتے ٹی ودکی کننگ کینہ و داڑآ ملک اٹی بھاز کاریم ہم مننگ ءِ۔ اوپارے کہ انسٹیٹیوشنل میموری نا بابت آن ہم ننے گام گیج ہرفوئی مریک انتئے کہ اسہ ملک اس ہرا محدوس وسیلہ تخک داڑآن ننے دوئی وسیلہ غاتے گچین وڑاٹ کاریم اٹ اتنگ اٹ کمک رسینگک۔ فیصل آباد کشاری یونیورسٹی ، ٹنڈوجام کشاری یونیورسٹی تا جوانی و سرسہبی تیان بلد اُٹ۔ اگہ ننا تینا کشاری پیدوار نا منڈی تیٹی اہمیت مفک تو ننے تینا خامی تیا نظر شاغوئی مریک۔ ننے تینا یونیورسٹی تیٹی فارغ التحصیل مروک آ طالب علم آتا پٹ وپولی لائخی و کشاری پٹ وپول ءِ پاکستان اسکان سرکروئی مریک۔ ننے کشت وکشار نا بابت آن اہم ءُ فیصلہ کروئی ءِ و داڑکن قومی امنائی سلاہ ودی کننگ نا گرج ءِ۔ اوپارے کہ ان لینڈ فشریز نا کمک اٹ نن بے کچ شون ہلنگ کینہ۔ 1999ء ٹی ننا فشریز نا ایکسپورٹ 300 ملین ڈالرئس۔ داسہ ننے500 ملین ڈالر اسکان سرمروئی ءِ وخت اس کہ ہمسایہ ملک 10ارب ڈالر اسکان سرمسنے۔ اوپارے کہ ہر کاریم نا حکومت آن اومیت کننگک۔ حکومت ءِ امدادی نہاد نا تعین ءِ کروئی ءِ۔ ریاست نا زمواری ءِ کہ فوڈ سیکورٹی نا بابت نیشنل سیکورٹی ءِ پک کے انتئے کہ خور انا رکھ انا قومی سلامتی تون بھلو تعلق اسے۔
