اسلام آباد۔ 12مارچ(اے پی پی) صدر مملکت ڈاکٹر عارف علوی پارینے کہ دنیا ٹی غٹ جنگ آک وسیلہ و دولت نا استحصال نا معاملہ غا مسر، زیات آن زیات وسیلہ دوئی کننگ نا مقابلہ غان ڈپریشن ودک، ڈپریشن و ذہنی زور آن دماغی جان جوڑی آ منفی زہم تمک، راجی آسراتی و غریب آتا کمک آن خوشی و است جمی دوئی مریک، سٹی انگا ہیت آتیا سجفنگ نا جاگہ غا اوفتے دماغ آن کشسا بھاریم ءِ سبک کننگے۔ داخیال آتا درشانی ءِ او پنچ شنبے نادے آ دماغی جان جوڑی آ پارلیمانی کانفرنس آن تران کرسا کرے۔ صدر مملکت پارے کہ تغ ءِ پورو کپننگ نا سوب آن دماغی زور ودک۔ ملک انا 30آن 40 درسد آبادی وڑنا وڑاسے نا زور انا گواچی ءُ۔ اوپارے کہ سٹی آہیت آتیا سجفنگ نا جاگہ غا اوفتے دماغ آن کشسا بھاریم ءِ سبک کننگے۔ راجی تعلقداری تیٹی کمتی بسنے، نن بایدے اسہ ایلو ءِ تینا ویل آتیان معلومدار کین۔ داڑآن دماغ آ بھاریم سبک مریک۔ دولت نا رند اٹ دُدینگ انگ راجی اولیت مسنے۔ دنیا ٹی غٹ جنگ آک وسیلہ و دولت نا استحصال نا معاملہ غا مسر۔ دنیا ناہر راج روحانی جان جوڑی آ ہم چکار کرینے۔ نن اللہ غا بھروسہ کین۔ اوپارے کہ صنعتی انقلاب آن پد زیبا انگا اشتہار آتا کمک اٹ خلقت ءِ خوش کننگ نا کوشست کننگا۔ ملک اٹی وسیلہ غاتا دوئی کننگ نا مقابلہ ءِ۔ داڑآن است جم ملپک۔ ذہنی زور انا ودنگ آن خوشی کم مریک۔
