کورونا وائرس نا توننگ کن حکومت گچین گام گیج کرینے، صدر مملکت ڈاکٹر عارف علوی نا ورچوئل یونیورسٹی نا کانووکیشن آن تران

اسلام آباد۔ 11مارچ(اے پی پی) صدر مملکت ڈاکٹر عارف علوی پارینے کہ مارکیٹ نا گرج آتا رداٹ تعلیم نا فراوانی آن بے روزگاری نا مون ءِ توننگ اٹ کمک رسینگک، علم انا زہم آک بندغ و راج آ دولت آن بھاز زیات مریرہ، ورچوئل یونیورسٹی کون آ ادارہ غاک علم انا مون آ دننگ اٹ اہم ءُ کڑد اس اداکننگ ءُ۔ فائیو جی ٹیکنالوجی آن مچ آ دنیا ٹی معلومداری نا سیلاب اس بننگ کیک۔ داخیال آتا درشانی ءِ او چارشنبے نادے آ ورچوئل یونیورسٹی نا کانووکیشن آن تران کرسا کرے۔ صدر مملکت پارے کہ علم انا زہم آک بندغ و راج آ دولت آن بھاز ود مریرہ۔ ورناچینک تینا لمہ و باوہ نا احسان مند مریر۔ اوپارے کہ ورچوئل یونیورسٹی کون آ ادارہ غاک علم انا مون آدننگ اٹ اہم ءُ کڑد اس ادا کننگ ءُ۔ انٹرنیٹ نا بننگ آن معلومداری اسکان رسینگ آسان مسنے۔ اوپارے کہ فاصلاتی تعلیم نا کمک اٹ علم و معلومداری نا مر مر انگا علاقہ غاتسکان سرمننگ ممکن مس۔ فائیو جی ٹیکنالوجی آن مچ آ دنیا ٹی معلومداری نا سیلاب اس بننگ کیک۔ اوپارے کہ کورونا وائرس نا توننگ کن حکومت گچین گام گیج کرینے۔ وائرس آن بچنگ کن پاریز گری ءِ تینا کرسا داڑآن بچنگ مریک۔ صفائی نیمہ ایمان ءِ ، نن بایدے صفائی نا خیال ءِ تخن، اوپارے کہ پوسکن آدورہ انا خواست آتے مون آتخسا طالب علم آتے تعلیم تننگے۔ اوپارے کہ خصوصی چناتے ہم لس اسکول آتے ٹی تعلیم تننگے تانکہ راج اتون بریبری سلوک مرے و داڑآن خصوصی بندغ آتے راجی ویل آتے پہہ مننگ و اوفتے تون مون تننگ نا حوصلہ ودی مریک۔ صدر مملکت پارے کہ پاکستان 51لکھ اوغان باہوٹ آتا مہمانداری ءِ کرے وخت اس کہ یورپی ملک آک پردیسی تے امنا کننگ کن تیار الور۔ اوپارے کہ راج انا نزور تپہ غاتے ہرفنگ ننا غٹ انا اجتماعی زمواری ءِ۔ صدر مملکت سرسہب مروک آ اومیتدار آتے ٹی گولڈ میڈلز و میرٹ سرٹیفکیٹ بشخا۔