اسلام آباد۔11مارچ(اے پی پی) وزیر خارجہ شاہ محمود قریشی پارینے کہ صوبہ سویلی پنجاب کن اسمبلی ٹی بل اس پیش کننگک۔ سویلی پنجاب سیکرٹریٹ نا جوڑ کننگ نا فیصلہ ءِ کننگانے، بروک آبجٹ اٹی سویلی پنجاب کن 35درسد بجٹ جتا کننگک۔ داخیال آتا درشانیءِ او وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان تون اوار چارشنبے نادے آ پارلیمنٹ ہائوس نا پیشن میڈیا تون گپ و تران کرسا کرے۔ وزیر خارجہ پارے کہ وزیراعظم نا کماشی ٹی سویلی پنجاب نا بابت آن دیوان اٹی وزیراعلی پنجاب تون اوار گچین مروک آ باسک آک ساڑی ئسر۔ سویلی پنجاب نا الس تون ہرا وعدہ غاتے کریسن اوفتا پوروی کن گچین گام ہرفینن۔ اوپارے کہ سویلی پنجاب صوبہ نا جوڑ کننگ کن اسمبلی ٹی بل اس پیش کننگک۔ اینو سویلی پنجاب نا الس کن خوشی نادے ءِ ، مبارکباد پیش کیوہ۔ اوپارے کہ بروک آ بجٹ اٹی سویلی پنجاب کن 35درسد بجٹ جتا کننگک۔ سویلی پنجاب نا فنڈ آتے پین جاگہ سے آ گدریفنگ مفک۔ صوبہ نا جوڑ کننگ کن پارلیمنٹ اٹی اِراتہائی گیشتری درکارءِ۔ سویلی پنجاب صوبہ نا سیکرٹریٹ نا جوڑ کننگ نا فیصلہ مسنے۔ وزیر خارجہ پارے کہ ایڈیشنل چیف سیکرٹری سویلی پنجاب و ایڈیشنل آئی جی سویلی پنجاب تعینات مریرہ۔ ایڈیشنل چیف سیکرٹری سویلی پنجاب نا دفتر بہاولپور اٹی مریک۔ ایڈیشنل آئی جی سویلی پنجاب نا دفتر ملتان اٹی مریک۔ سویلی پنجاب سیکرٹریٹ نا جوڑ کننگ کن 3نیم ارب روپئی درکار مریک۔ اوپارے کہ سویلی پنجاب سیکرٹریٹ کن 13ءُ نیم سد ودکی آسامی درکار مریک۔ سویلی پنجاب صوبہ نا فیصلہ غان بنجا سوگو مریک۔ مسلم لیگ (ن) اِراتہائی گیشتری آن پد ہم سویلی پنجاب ءِ صوبہ اس جوڑ کننگ کتو۔ اوپارے کہ قومی اسمبلی ٹی بل پیش کننگ نا مسخت پوسکن آ صوبہ غا امنائی سلاہ قائم کننگ ناءِ۔ داوخت آ وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارے کہ وزیراعظم عمران خان تون سویلی پنجاب نا اہم سرکڑدہ سرجم نشست اس کرینے، سویلی پنجاب صوبہ نا جوڑ کننگ نا بابت باندات آتیا سرجم ہیت مس۔ اوپارے کہ اوڑدہی ٹی سویلی پنجاب صوبہ نا سلاہ ئی سیکرٹریٹ نا جوڑ کننگ نا ہم جاچ ءِ ہلنگا۔ وزیراعظم سویلی پنجاب نا الس نا محرومی تے مر کننگ خواہک۔ اوپارے کہ اسلام آباد جہاز شکست اٹی شہیدپائلٹ نا درجہ غاتا بڑزکن کن دعاگواُن۔ شکست اٹی شہید پائلٹ نا خاہوت تون دلی ہمدردی نا درشانیءِ کینہ۔
