اسلام آباد۔ 11مارچ(اے پی پی) بنجائی وزیر ڈٹ بندی ، شونداری ، اصلاحات و خصوصی گام گیج اسد عمر پارینے کہ زرگزران اٹی بدلی تیان پد ہم ڈٹ بندی نا کڑد کم متنے ، وزارت ڈٹ بندی نا کاریم نا کچءِ ودفنگ آن مرکزی کڑد ادا کننگ مریک، نجی بشخ ءِ سازگار چاگڑد اس فراوان کننگ ریاستی زمواری ءِ۔ داخیال آتا درشانی ءِ او چارشنبے نادے آ پاکستانی زرگزران اٹی ڈٹ بندی و شونداری نا کڑد انا سرحال آ شرہ غان تران کرسا کرے۔ اوپارے کہ 2008ء نا زرگزرانی تنکی آن پد ڈٹ بندی نا اہمیت اٹی ودکی مس، ملکی شونداری ٹی ڈٹ بندی نا اہم ءُ کڑد اسے، مستین اٹی ڈٹ بندی پاکستان نا شونداری ٹی اہم ءُ کڑد اس اداکرے۔ اسد عمر پارے کہ وزیراعظم وزارت ڈٹ بندی ءِ لیڈ ہلنگ نا پارے، تدوک آ پنجا سال اٹی زرگزران نا بنداوی پنجر بدل مس۔ زرگزران اٹی بدلی تیان پد ہم ڈٹ بندی نا کڑد کم متو۔ اوپارے کہ وزارت ڈٹ بندی نا کاریم نا کچ ءِ ودفنگ آن مرکزی کڑد ادا کننگ مریک، زرگزران اٹی ریاست نا کڑد ءِ گوجالنگ مفک، تیل انا کوڑی تیان پد ہم شست انا دہائی ٹی خلیجی ملک آک نیزگاری نا گواچی ئسر۔ اسد عمر پارے کہ ریاست نا مرکزی کڑد آن خلیجی ملک آک نیزگاری آن پیش تمار۔ ساڑی دور اٹی چین نا زرگزران ڈٹ بندی نا گچین ءُ مثال اسے۔ اوپارے کہ مسہ سالہ شونداری اسٹریٹجی آ کاریم کننگ اُن، نجی بشخ ءِ سازگار چاگڑد اس فراوان کننگ ریاست نازمواری ءِ، زرگزرانی شونداری و فلاح اسہ آئینی زمواری اس ہم ارے۔ اسد عمر پارے کہ وزارت ڈٹ بندی نا کڑد مرکزی پلیٹ فارم اس فراوان کننگ ناءِ، دنیا نا ذہین انگا خلقت نا کمک اٹ ڈٹ بندی کننگ وزارت نا زمواری ءِ۔ اوپارے کہ زرگزرانی وزارت آتے ٹی کمکاری ءِ ودفنگ نا اہمیت آن نمن مننگ مفک، پاکستانی راج اکن 18 می ترمیم بھاز المی ئس۔ اسدعمر پارے کہ مشترکہ مفادات کونسل یعنی کونسل آف کامن انٹرسٹ (سی سی آئی) نا سیکرٹریٹ جوڑ کننگ اُن، سی سی آئی نا سیکرٹریٹ ءِ فعال کینہ، اصلاحات و کاریم نا کچ ءِ ودفنگ نا بھاز گرج ءِ، اوپارے کہ سول سروس اٹی کیریئر پلاننگ بنداوی گرج ءِ۔
