اسلام آباد۔ 11مارچ (اے پی پی) وزیراعظم نا خصوصی کمکار سمندر پار پاکستانیز سید ذوالفقار بخاری پارینے کہ او پی ایف بورڈ آن اِراکروڑ نا فنڈ منظور کرفسا چین اٹی پاکستانی طالب علم آتے کنوئی آ گڑا فراوان کننگ اُن۔ وزارت سمندر پار پاکستانیز نا ترجمان نا کنڈآن جاری کروک بیان نا رداٹ وزیراعظم نا خصوصی کمکار نجی ٹی وی چینل تون گپ وتران کرسا پارے کہ سوشل میڈیا غا کنتون گنڈوک 3 ہزار زائر آتے پاکستان اتنگ نا خبر سراسر بے بنداو ءِ۔ اوپارے کہ تفتان بارڈر آ فوج و ہندی صوبائی انتظامیہ چیک تخرہ۔ تفتان بارڈر مرے یا چین بارڈر، حکومت پاکستان نا پالیسی بھاز پیدوار ءِ۔ اوپارے کہ ننا پالیسی تو پاکستان ءِ کورونا وائرس نا تالانی آن بچفوئی ءِ، ایلو ملک آتا نسبت حکومت پاکستان کورونا وائرس نا تالانی ءِ توننگ اٹ بھلو حد اسسکان سرسہب مسنے۔ زلفی بخاری پارے کہ چین اٹی اختہ پاکستانی طالب علم آتا امداد نا بابت آن اوپی ایف بورڈ آن اِراکروڑ نا فنڈ منظور کرفسا چین اٹی پاکستانی طالب علم آتے خور فراوان کننگ انگ ءِ۔ اوپارے کہ چین اٹی رہینگوک آ 1300پاکستانی طالب علم آتے راشن نا فراوانی کن اوفتا پورو فہرست وزارت خارجہ غان بٹنگانن و چین اٹی رہینگوک آ طالب علم آتا لمہ و باوہ غاتون پدریسہ رابطہ ٹی اُٹ۔
