اسلام آباد۔ 11مارچ(اے پی پی) وزارت ریلوے نا کنڈآن قومی اسمبلی ءِ پاننگانے کہ سپریم کورٹ کراچی سرکلر ریلوے ءِ شش تُو اٹی پورو کننگ نا پارت کرینے، وزارت ریلوے و سندھ حکومت اسہ پنہ غاٹو، نن جائز اُراتے بٹتنون، چار کلومیٹر نا علاقہ ٹی بیرہ پنجا فٹ جاگہ ءِ واگزار کرفنگ خوانہ، کراچی سرکلر ریلوے ءِ سندھ حکومت تون اواری اٹ شش تُو اٹی پورو کینہ۔ چارشنبے نادے آ قومی اسمبلی ٹی وقفہ سوج آتے ٹی شمس النساء نا سوج انا ورندی ٹی وزارت ریلوے نا پارلیمانی سیکرٹری فرخ حبیب پارے کہ اسٹ اس ہم شکست و انسانی جان تا زیان مننگ ءِ خواپک ، ریلوے نا نظام 1857ء نا ءِ ۔ نن دادے گچین کننگ کن کوشست کننگ اُن۔ کراچی آن پشاور اسکان ریلوے ٹریک ءِ دورویہ کننگ تون رکھی باڑ خلنگک ہراخلقت نا جانی زیان مس اوفتے زراعانت تننگانے۔ نن ریلوے نا ریونیو تون اوار مچ آ نظام ءِ گچین کننگ تون اوار اوار شکست آتا مون ءِ توننگ نا کوشست کننگ اُن۔ اوپارے کہ مستین اٹی ہم شکست آک مرساکرینو، نن ہچ کس آ دوبہ خلنگ خواپنہ ولے آخبت شکست آتا توننگ کن گام گیج کننگ انگ ءِ۔ اقبال محمد علی خان نا کراچی سرکلر ریلوے نا بابت سوج انا ورندی ٹی بنجائی وزیر شیخ رشید احمد پارے کہ سپریم کورٹ نا پرمان ءِ کہ کے سی آر ءِ زوت آن زوت پورو کننگے ولے ڈغار تے واگزار کرفنگ نا برخلاف مچ آ پارٹیک یکجا مسنو۔ سپریم کورٹ نا پرمان ءِ کہ برجز و انڈر پاسءِ شش تُو اٹی پورو کننگے۔ دا زمواری ءِ سندھ حکومت ءِ تننگانے۔ ننے ٹرین تے چلیفنگ نا پرمان ملانے ۔ اوپارے کہ زہمیک مستین اٹی اڑزان ڈغار تے ہلکونو۔ سندھ حکومت و نن اسہ پنہ غاٹون۔ ننے مالی مشکلات ءِ، ڈغار تننگ کن تیار اُن۔ سندھ حکومت تون اواری اٹ کراچی سرکلر ریلوے ءِ پورو کینہ۔ وپارے کہ چار کلومیٹر نا علاقہ ٹی اُراتے خورک کرفنگ کن جائز اُراتے دڑفنگتنے۔ نن بیرہ 50فٹ جاگہ ءِ واگزار کرفنگ خوانہ۔
