اسلام آباد۔ 11مارچ(اے پی پی) صوبائی وزیر پرائمری اینڈ سیکنڈری ہیلتھ کیئر ڈاکٹر یاسمین راشد الس ءِ پارینے کہ خلینگ نا ہچ ءُ گرج اس اف انتئے کہ پاکستان اٹی کروناوائرس نا شدت ایلو ملک آتا مقابلہ ٹی داسہ ہم کم ءِ ، ولے پاریزگری ءِ پک کروئی مریک۔ ریڈیو نا حالات حاضرہ پروگرام اٹی گپ و تران کرسا اووضاحت کرے کہ کورونا وائرس نا نشانی تیٹی جکہ، و ساہ ہلنگ اٹ دقت اوار ءِ و بھلا نشانی تیٹی دا وائرس ساہ ہلنگ اٹ مشکل، بک آتا خرابی یا مرک انا سوب مننگ کیک۔ ڈاکٹر یاسمین راشد پارے کہ نن غٹ کم آن کم20سیکنڈ اسکان تینا دوتے جوان بایدے سلن، و اگہ صابن و دیر مف تو اوفتا جاگہ غا الکحل آ مبنی ہینڈ سینیٹائزر کاریم اٹ اتنگے، اوپارے کہ کرونا وائرس جہانی کہول آتالان مسنے و داوخت اسکان دا 150ملک آتے ٹی سرمسنے، پاکستان اٹی ہم گڑاس کیس رپورٹ مسنے ہرافتیان 15 کیس سندھ آن ءُ و گڑاسے نا تعلق گلگت بلتستان آن ءِ ۔ اوپارے کہ پاکستان اٹی کورونا وائرس نا کچ داسہ 19مسنے و زہمی غٹ بندغ آک پیشن نا ملک آن سفر کرسا بسنو۔ ڈاکٹر یاسمین راشد مستی پارے کہ دا وائرس نا تالانی بھاز ترند ءِ، دا اسہ دَینی ءُ ناجوڑی اسے الس پاریز گری اختیار کے و باقاعدگی اتون وقفہ وقفہ غاتینا دوتے سلنگ و زہمی بندغ آک ماسک آتے کاریم اٹ اتیر۔ او مستی پارے کہ صوبہ پنجاب اٹی مسہ شکبر بندغ چاروکی ٹی ءُ، پنجاب حکومت 80آن زیات شکبر مریض آتا نمونہ غاتے لیب ٹیسٹ اکن گدریفیسس ولے اوفتا کورونا آن زہمی مننگ پک متو۔
