پاکستان کیہی پِڑتیا سرسہبی دوئی کرینے، صدر مملکت ڈاکٹر عارف علوی نا جہانی رسک مینجمنٹ کانفرنس آن تران

اسلام آباد۔ 10مارچ(اے پی پی) صدر ڈاکٹر عارف علوی پارینے کہ دنیا ءِ جہانی چاگڑدی باسنی و ایٹمی جنگ کون آ گڑتی تا چیلنج آک مون تروک ءُ، جہانی راہشونک فائدہ غاتیان ایڑتر مرسا جہانی امن و انصاف نا رداٹ فیصلہ کیر، تنظیم اسے نا شونداری ٹی گچین گورننس کلیدی اہمیت تخک، پاکستان کیہی پڑتیاسرسہبی دوئی کرینے۔ داخیال آتا درشانیءِ او سے شنبے نادے آ جہانی رسک مینجمنٹ کانفرنس آن تران کرسا کرے۔ صدر مملکت پارے کہ کرپشن نا چٹفنگ و شفاف احتساب نا نظام کن گچین گام گیج کننگانے، مصنوعی ذہانت نا کمک اٹ ہر بشخ اٹی رسک انا پیشگی ادراک مننگ کیک، مصنوعی ذہانت آن بینکنگ سیکٹر آن فائدہ ہرفنگ انگ ءِ، انشورنس نا بشخ اٹی رسک مینجمنٹ نا اہم ءُ عمل دخل اسے۔ اوپارے کہ جہانی حدت اٹ ودکی ننا چاگڑد کن بھلو رسک اس مسنے، ایٹمی جنگ انا گڑتی اسہ پین بھلو رسک اسے۔ صدر مملکت پارے کہ جہانی راہشونک فائدہ غاتیان ایڑتر مرسا جہانی امن و انصاف نا رداٹ فیصلہ کیر۔ اوپارے کہ زمی جمب کون آ قدرتی آفت آتا حالیت اٹ بھلو نسخان آتون مون تروئی تمک۔ سجفوک ڈٹ بندی آن بیدس تعمیرات ہم خطرہ غاتا سوب مریک۔ اوپارے کہ تیل انا نہاد آتے ٹی اناگت کمتی نا ادراک ممکن الوکہ ولے کورونا وائرس و سارس وائرس کون آ ناجوڑی تا پیش گوئی مہالو آن کننگاسس۔ داکان مست صدر مملکت انسٹیٹیوٹ آف رسک مینجمنٹ پاکستان نا بناءِ کرے۔ ماڑی پٹرولیم پرائیویٹ لمیٹڈ نا منیجنگ ڈائریکٹر لیفٹیننٹ جنرل (ر) اشفاق ندیم احمد و انسٹیٹیوٹ آف رسک مینجمنٹ پاکستان نا سروک سوہاب مشتاق ئسک ہم کانفرنس آن تران کریر۔