وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ٹویٹ

اسلام آباد۔ 10مارچ(اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان تینا پدریسہ جہد، خواری و لگن اٹ مدام تینا مخالف و ناشیف خلوک آتے غلط پک کرے، او ژند مروک و سڑوک آ نظام ءِ سہی کننگ کن پرعزم ءِ، سخت انگا وخت آن نن گدرینگانن، سہی سمت اٹ اصلاحات و گام گیج آتا بھرم الس ءِ سرمننگ بناکرینے، السی شونداری و شونہالی عمران خان نا نصب العین ءِ۔ سے شنبے نادے آ اسہ ٹویٹ اسے ٹی او پارے کہ احساس کفالت پروگرام ءِ مہمند نا مر مر انگا علاقہ غاتسکان سرکننگ عمران خان نا قبائلی الس تون مہرومریبت و مر مر انگا علاقہ غاتے شونداری نا دنگ اٹ اوار کننگ نا عزم انا پیدوار درشانی ءِ، ملکی تاریخ اٹی اولیکو وار حقدار طالب علم آتے پنجا ہزار اسکالر شپ ملک۔ اوپارے کہ وزیراعظم ہندن ءُ فلاحی ریاست نا جوڑ کننگ نا خواہندار ءِ ہراڑے وسیلہ غاک امراء نا جاگہ غا محرومی تیا خڑچ مریر، وزیراعظم نااحساس ضلعی شونداری پورٹل ”ڈیٹا فار پاکستان نا اجراء“ پوسکن آ ٹیکنالوجی نا کاریم اٹ اتنگ نا کمک اٹ ملک اٹی نیزگاری نا چٹفنگ و راجی رکھ انا مون آ دننگ اٹ کمکار مریک، پورٹل نا کمک اٹ ملک اٹی نیزگاری نا کچ انا سہی جاچ ممکن مننگ کیک۔ ڈاکٹر فردوس عاشق اعوان پارے کہ نیزگار و محرومی تا حق انا رکھ اکن چست کروک آ دا عملی گام گیج عمران خان نا اختہ مروک آ تپہ غاتون وابستگی نا شاہدی ءِ۔