پاکستان و ایران نا ریلوے ٹی ہڑتوم آ کنڈآتا کمکاری ءِ برجاتخنگ و اودے ودفنگ آ امنا
اسلام آباد۔ 10مارچ (اے پی پی) بنجائی وزیر ریلوے شیخ رشید احمد تون پاکستان اٹی تعینات ایران نا سفیر سید محمد علی حسینی اوڑدہی کرے، اوڑدہی ٹی ہڑتوم آ ملک آتا ہڑتوم آ کنڈآتا معاملہ غاتا باندات آتیا گپ و تران مس، ہڑتوم آ ملک آتانیام اٹ ریلوے نا بابت آن باندات آتیا شرہ مس، ہڑتوم آ کنڈآتا کمکاری ءِ برجاتخنگ و اودے ودفنگ آ ہم امنا کننگا۔ اوڑدہی ٹی سیکرٹری /چیئرمین ریلویز حبیب الرحمان گیلانی و ایلو آفیسر آک ہم ساڑی ئسر۔ بنجائی وزیر ریلوے شیخ رشید احمد پارے کہ پاکستان و ایران نا نیام اٹ دیرینہ تعلقداری ءِ ہراکہ آخبت اٹ پین سوگو مریرہ۔ اوہڑتوم آ ملک آتے ٹی امن و ایلمی نا مون آ دننگ کن گام گیج آتے گچین و سوگو کننگ آ زور شاغار۔ بنجائی وزیر کوئٹہ تفتان سیکشن نا اپ گریڈیشن کن ایران نا کنڈآن ٹیکنیکل ٹیم ءِ دورہ نا سلہ خلک۔ اوپارے کہ ایران و پاکستان نا نیام اٹ ریلوے نا کمک اٹ واپار نا مون آ دننگ کن پین گام گیج کننگک۔ وزیر ریلوے پارے کہ ریلوے ٹی الس کن سفری آسراتی کن وزارت ریلوے پرعزم ءِ۔ اوپارے کہ کوئٹہ تفتان ریلوے لائن آن واپار اٹی مون آ دننگ آن زرگزرانی شونداری ٹی پین ودکی مریک۔ شیخ رشید احمد پارے کہ ہڑتوم آ ملک آتا کنڈآن ریلوے نا بابت آن باندات آتے کن فوکل پرسن مقرر کننگک ہراکہ ریلوے نا ہڑتوم آ کنڈآتا باندات آتا جاچ ءِ ہلیرہ۔ ایرانی سفیر اسلام آباد، تہران، استنبول کنٹینر ٹرین نا دُوارہ بنا نا است خواہی نا درشانی ءِ کرے۔ اوپارے کہ داٹرین آن نئے بیرہ فریٹ بلکن ٹورازم اٹی ہم ودکی مننگ کیک۔ ایرانی سفیر وزیر ریلوے نا کنڈآن ریلوے نا شونداری کن گام گیج آتا ستاءِ کرے و دا چرجوئی ٹی کمکاری آ بنجائی وزیر شیخ رشید احمد و حکومت پاکستان نا منت واری ءِ ہرفے۔
