اسلام آباد۔ 10مارچ (اے پی پی) بنجائی وزیر انسانی حق ڈاکٹر شیریں مزاری پارینے کہ پولیس اسٹیشن تیٹی زالبول آتا ویل آتے دمدستی ایسر کننگ کن باقاعدگی اٹ کھلی کچہری اڈ تننگے، امن و ایمنی کن پولیس نا کڑد بے کچ اہم ءِ، ملک انا شونداری کن ننے تینا صف آتے ٹی سیوت ودی کننگ نا گرج ءِ۔ داخیال آتا درشانیءِ او سے شنبے نادے آ ”پاکستان اٹی کمیونٹی پولیسنگ اینڈ پوسٹ کونفلکٹ پولیس ریفارم“ نا سرحال اڈ ہلوک جہانی کانفرنس آن تران کرسا کرے۔ ڈاکٹر شیریں مزاری پارے کہ پاکستان نا آئین حکومت ءِ ملک انا غٹ شاری تا حق انا فراوانی نا پابند کیک و حکومت پبی کوشست کننگ ءِ الس نا ویل آتے اولیتی بنداو تیا ایسر کننگے۔ اوپارے کہ ملک اٹی امن و ایمنی کن پولیس نا کڑد بے کچ اہم ءِ و ننے وخت اتون پولیس نا نظام اٹ پوسکن آ خواست آتون ہم گرنچ اصلاحات اتنگ نا گرج ءِ، داوخت آ ملک ءِ بے شمار ویل آتا مون تروک ءِ ہرافتے ایسر کننگ کن پبی گام گیج کننگ انگ ءِ۔ اوپارے کہ گڑاس ویل ہندن ءُ ہرافتے تون مچ آ دنیا مون تننگ ءِ ہرافتے ٹی موسمیاتی بدلی، اقلیت آتا حق انا فراوانی کون آ ویل آک اوار ءُ۔ اوپارے کہ فاٹا کون آ علاقہ ٹی ہم کمیونٹی پولیسنگ نا گچین ءُ نظام اسے نا گرج ءِ۔ اوپارے کہ الس و کمیونٹی پولیس نا نیام اٹ گچین رابطہ ودی کننگ نا گرج ءِ تانیکہ ویل آتے بنائی وڑاٹ ایسر کننگ مرے۔ اوپارے کہ زالبول آتا جہانی دے اناوخت آ زالبول مارچ آ خل خو کروک آتا برخلاف شفاف جاست وپاست کننگے۔ کانفرنس نا ایسر آ خواست آتے پیش کرسا پارے کہ پولیس اٹی بے المی سیاسی نیام تمنگ ءِ چٹفنگے، صوبائی و ضلعی کہول آ پولیس نا کارکڑد ءِ ہُننگ کن بے کنڈ ہلوک کمیشن اس جوڑ کننگے، پولیس اٹی بھرتی، تقرری و بدلی نا نظام ءِ شفاف جوڑ کننگے، تھانہ نا مالی، انسانی و تکنیکی وسیلہ غاتے ٹی ودکی کننگے۔ پولیس کارندہ غاتیان 8گھنٹہ آن زیات ڈیوٹی ہلنگپ، ضلعی کہول آ اینٹی جینڈر سیل کرائم سیل اس جوڑ کننگے۔ ہرتھانہ ٹی کم از کم اِرا زالبول پولیس کارندہ تعینات کننگے، پولیس جاست وپاست و ٹریننگ نا بجٹ اٹ ودکی کننگے، ایس ایچ او ءِ ہر تھانہ غان کم از کم اِراسال مست بدلی کننگپ۔
