18 تُو انا خواری آن روپئی سوگو مس، فروری ٹی برآمد آتے ٹی 13.6 درسد ودکی مس
اسلام آباد۔ 10مارچ (اے پی پی) وزیراعظم نا سلاہکار واپار عبدالرززق داؤد پارینے کہ 18 تُو انا خواری آن روپئی سوگو مس، فروری ٹی سالانہ بنداو تیا برآمد آتے ٹی 13.6 درسد ودکی مسنے، سی پیک پاکستان ءِ چین و نیامی ایشیا نا منڈی تسکان رسینگ ایتک، داڑآن پاکستان ءِ بروک آ سال آتے ٹی کمک رسینگک۔ حکومت زرگزرانی سوگوی کن وخت آ گام گیج کرینے، ارٹ میکو مرحلہ ءِ فائنلائز کرینن، نن صنعتی بشخ اٹی کمکاری، پیدواری لائخی ٹی ودکی و جوائنٹ ونچرز نا است بڈی ءِ کننگ اُن۔ داخیال آتا درشانیءِ او زرکاری بورڈ انا کنڈآن سی پیک اقتصادی زون نا بابت آن سیمینار آن تران کرسا کرے۔ سلاہکار واپار پارے کہ سی پیک نا بروک آ مرحلہ ٹی کشاری کمکاری ءِ ہم اوار کننگانے، داٹی کمرشل کمکاری ہم اوار ءِ، کشاری بشخ اٹی زرکاری کننگک۔ اوپارے کہ سی پیک پاکستان نا فائدہ ٹی ءِ، پاکستان اٹی توانائی نا تنکی ئس، چین نا کمک اٹ دانا مونءِ تورینم، داسہ وخت صنعت، کشت وکشاراٹی کمکاری ءِ ودفنگ ناءِ، ریلوے ٹی ہم چین آن کمکاری نا خواہندار اُن۔ سی پیک بی آر آئی نا بشخ اسے۔ اوپارے کہ داوخت اٹی ایلو ملک آتا برآمد آتے ٹی کمتی مس ولے پاکستان اٹی ودکی مس۔ زرگزران اٹی سوگوی بسنے، جہانی منڈی ٹی تیل انا نہاد آک کم مسنو، داڑآن برجا نسخان اٹی پین کمتی بریک، ایس ای سیز جوڑ کننگ انگ ءِ، زرکار آتے ہروڑنا پرکشش مراعات تننگ اُن، اوپارے کہ ٹیکسٹائل تون اوار چندی بشخ آتے ٹی زرکاری بننگ ءِ، ٹیکسٹائل بشخ انا ویل منڈی اف بلکن کچ ءِ، ننے مارکیٹ اسکان رسینگ ملانے، یورپ آن جی ایس پلس ءِ وودکی رسینگانے، داڑآن شونداری نا خاطر خواہ وارخواہی ملک، دا جوان ءُ وخت اسے دادے بایدے زیان کننگپ۔ اوپارے کہ وزیراعظم عمران خان نا سرکڑدہ ئی ویژنری ءِ، داڈائریکشن و وژن آن چینی زرکار آتا است بڈی مسنے، پاکستان نا زرگزران اٹی سوگوی بسنے، دا سوگوی نا گچین ءُ بھرم اس مون آ بریک۔ اوپارے کہ زرکاری بورڈ اتون اواری اٹ چین پاکستان اٹی ایس ای سیز اٹی زرکاری کننگ ءِ۔ چین نا صنعت کار پاکستان اٹی زرکاری کننگ اٹ خصوصی است خواہی تخرہ، نن ایس ای سیز اٹ ایلو ملک آتا زرکاری ءِ ہم بخیر اٹ پانہ، تدوک آ شش تُو اٹی ٹائر، بس، ٹرک جوڑکننگ و ٹیکسٹائل نا بشخ اٹی چندی اسیجا ڈٹ بناکرینے، چین آ پت ءِ کہ پاکستانی زرگزران ترندی اٹ شون ہلیک۔
