اقوام متحدہ۔ 10مارچ(اے پی پی) اقوام متحدہ پارینے کہ کوروناوائرس نا ترندی اٹ تالان مروک دَین نا سوب آن جہانی زرگزران ءِ اینخو نا سال 1کھرب ڈالر آن زیات نسخان مننگ کیک، حکومت آتے مرے کہ او داوائرس نا زہم تیان بچنگ کن دمدستی گام گیج کیر۔ اقوام متحدہ نا ادارہ واپار و شونداری (یو این سی ٹی اے ڈی) نا کنڈآن تدوک آ دے جاری مروک آ جاچ رپورٹ نا رداٹ کوروناوائرس نا ترندی اٹ تالان مننگ نا سوب آن گڑاس ملک آک کساد بازاری نا گواچی مننگ کیرہ وخت اس کہ جم جہانی اقتصادی شرح نمو ہم سست روی نا گواچی مریک۔ ادارہ نا گلوبلائزیشن و ڈویلپمنٹ سٹریٹجیز نا ڈائریکٹر رچرڈ کوزل رائٹ نا پاننگ ءِ کہ اینخو نا سال جہانی اقتصادی شرح نمو 2 درسد آن کم مننگ نا کساس ءِ ہرا ستمبر نا کساس آن 1ٹریلین (کھرب) ڈالر کم مریک۔ دا رپورٹ ءِ ہندن ءُ وخت اسے آ جاری کننگانے ہراتم جہانی مالیاتی ادارہ چین اتون سپلائی چین زہمی مننگ ناسوب مشکلات آتا گواچی ءِ داکان بیدس خام تیل انا برآمد کنندگان تا نیام اٹ عدم مفاہمت ہم سیال دولت نا نرخ آتے ٹی بے پک حالیت آتا سوب مننگ ءِ۔ اونا پاننگ ئس کہ دا کساس ءِ خلنگ کے جہانی مالیاتی مارکیٹ آتے کورونا وائرس نا زہم آتون امر مون ایترہ، وخت آن مست ءِ۔ رچرڈ کوزل رائٹ پارینے کہ حکومت آتے پارے کہ او کورونا وائرس نا درک و اونا خوف ءِ کم کننگ کن وخت آ گام گیج کیر ورنہ دانا نسخان آک گمان آن ہم زیات مننگ کیرہ۔ کورونا وائرس آن زہمی ملک آک بشمول امریکہ و چین نا ردعمل نا بارواٹی سوج آ رچرڈ کوزل رائٹ پارے کہ چینی حکومت نا کنڈآن خڑچ آتے ٹی ودکی و خراج آتے ٹی رعایت کون آ نمان گام گیج آتا گمان ءِ۔