اسلام آباد۔ 10مارچ (اے پی پی) پاکستان کرکٹ بورڈ انا کنڈآن جاری پنچ می پاکستان سپر لیگ اٹی چارشنبے نادے آ پین اسہ میچ اس مریک ہراٹی ملتان سلطانز و کوئٹہ گلیڈی ایٹرز نا ٹیم قذافی اسٹیڈیم لاہور اٹی مون پہ مون مریرہ۔ دا میچ شام انا ہفت بجہ غا بناکیک۔ سرجم حوال آتا رداٹ ایچ بی ایل پاکستان سپر لیگ 2020ء نا میلہ مچ آ ملک اٹی زوروشور اٹ برجاءِ ہراٹی شونقی تے جوان ءُ کرکٹ اس ہُننگ کن ملنگ ءِ۔ لیگ انا 25می میچ چارشنبے نادے آ ملتان سلطانز و کوئٹہ گلیڈی ایٹرز نا ٹیم تا نیام اٹ قذافی اسٹیڈیم لاہور اٹی مریک۔ کوئٹہ گلیڈی ایٹرز نا ٹیم سرفرازا حمد نا کماشی ٹی میدان اٹ دڑنگک وخت اس کہ ملتان سلطانز ٹیم انا کماشی ءِ شان مسعود ءِ تننگانے۔ ملتان سلطان نا ٹیم لیگ اٹی غٹ آن زیات 11پوائنٹ آتون اولیکو نمبر آٹے وخت اس کہ کوئٹہ گلیڈی ایٹرز نا ٹیم شش پوائنٹ آتون شش میکو نمبر آٹے۔ لیگ اٹی اوار 6ٹیم تیٹی اسلام آباد یونائیٹڈ، کوئٹہ گلیڈی ایٹرز، کراچی کنگز، لاہور قلندر، پشاور زلمی و ملتان سلطان اوار ءُ، لیگ اٹی فائنل تون اوار 34میچ گوازی کننگک۔ لیگ انا راولپنڈی و ملتان اٹی میچ مسنے وخت اس کہ لاہور اٹی 14 و کراچی ٹی 9 میچ گوازی کروئی ءِ ہرا برجاءِ۔ ایچ بی ایل پی ایس ایل فائیو اٹی 10لکھ امریکی ڈالر نا انعام بشخنگک۔ لیگ انا فائنل میچ 22مارچ آ قذافی اسٹیڈیم لاہور اٹی مریک۔
