گوازی آن مشکل حالیت آتا مقابلہ ءِ کننگ ہیل کریٹ، عمران خان
پشاور۔ 09مارچ (اے پی پی) وزیراعظم عمران خان پارینے کہ گوازی متوکہ تو سیاست اٹی باتسوٹہ، زند شیف و بڑز انا پن ءِ، تمنگ آن بش مروک آ مست آن زیات سوگو مریک، گوازی آن مشکل حالیت آتا مقابلہ ءِ کننگ ءِ ہیل کریٹ، دوشنبے نادے آ قیوم اسپورٹس کمپلیکس پشاور اٹی انڈر 21 گیم تا بنائی دود آن تران اٹی وزیراعظم عمران خان پارے کہ زند مقابلہ نا پن ءِ، اوپارے کہ شکست آن باتفروک آ چیمپیئن مریک انتئے کہ او تینا شکست نا سوب آتے مون آ تخسا ہنداخہ پین خواری کیک، اوپارے کہ تمنگ آن پد بش مروک آ مست آن زیات سوگو مریک، اینو اسکان اسٹ اس ہم دنیا ٹی چیمپیئن متنے ہرا باتننگ ءِ تپ، اپارے کہ اگہ سپورٹس اٹی متوٹہ تو ای 22سال اسکان سیاست کتوٹہ و بھاز زوت باتسوٹہ، خواننگ و بزنس اٹی ہم مقابلہ مریک، سیاست ہم مقابلہ نا پن ءِ، چیمپیئن باتننگ آن خلپک، ہیل کیک، انسان ہموتم باایتک ہراتم باتننگ ءِ امنا کے، وزیراعظم عمران خان گوازی تا اڈتننگ آ وزیراعلیٰ محمود خان ءِ مبارکباد ترسا پارے کہ دا گیم تیان ورناتا ٹیلنٹ مون آ بریک، ورناتے اسپورٹس نا اہمیت ءِ پاننگ خواوہ، خلق انا کہول آ گوازی تے مون آ دروئی مریک۔ اوپارے کہ اینو نمے دا یات تخوئی ءِ کہ نم دا پاکستانی قوم انا بشخ اورے ہرا دے انشاء اللہ دنیا نا عظیم انگا قوم جوڑ مروئی ءِ۔ داکان مست وزیراعظم عمران خان انڈر 21 گیم تا بناءِ کرے۔ دا وخت آ آتش بازی نا شاندار درشانی ءِ کننگا ہراڑآن اسٹیڈیم نا چاگڑد آ رنگ اس تالان مس، گورنر شاہ فرمان، وزیراعلیٰ خیبر پختونخوا محمود خان و صوبائی وزیر آک ہم دود اٹی ساڑی ئسر۔
