کورونا وائرس دنیا کن بھلو گڑتی اس جوڑ مسنے، کشمیر نا ویل ءِ ایسر کننگ کن جہانی برادری تینا کڑد ءِ ادا کے
اسلام آباد۔ 09مارچ (اے پی پی) اسپیکر قومی اسمبلی اسد قیصر پارینے کہ کوروناوائرس دنیا کن اسہ بھلو گڑتی اس جوڑ مسنے، اسلاموفوبیا انسانی حق اکن خطرہ اس جوڑ مسنے، جہانی برادری نا دا فورم آن کشمیر نا ویل آ چکار کرفنگ خواوہ، کشمیر نا ویل ءِ ایسر کننگ کن جہانی برادری تینا کڑدءِ ادا کے، انسانی حق انا تنظیمک کشمیر نا ویل آ چُپ ءُ، کشمیر اٹی انسانی المیہ ودی مننگ ءِ۔ داخیال آتا درشانی ءِ اودوشنبے نادے آ یوم دولت مشترکہ سیمینار آن تران کرسا کرے۔ اوپارے کہ لندن اعلامیہ ءِ ہفتاد سال مس۔ جمہوریت دا اعلامیہ غان پد سوگو مننگ ءِ۔ کورونا وائرس دنیا کن اسہ بھلو خطرہ اس جوڑ مسنے۔ اوپارے کہ اسلاموفوبیا انسانی حق اکن خطرہ اس مسنے۔ جہانی برادری نا دافورم آن کشمیر نا ویل آ چکار کرفنگ خواوہ۔ شہریت بل آن پد انتس کہ بھارت اٹی مسلمان آتون مننگ ءِ اوڑآ دنیا تینا خن تے ملے۔ اسد قیصر پارے کہ کشمیر نا ویل ءِ ایسر کننگ کن جہانی برادری تینا کڑد ءِ ادا کے۔ انسانی حق انا تنظیمک کشمیر نا ویل آ چُپ ءُ۔ کشمیر اٹی انسانی المیہ ودی مننگ ءِ۔ اوپارے کہ پنچ شنبے آن پارلیمنٹ اٹی کشت وکشار آ شرہ کرفنگ والااُن۔ دا شرہ نا مسخت بروک آ بجٹ اٹی بزغر دوست پالیسی اس اتنگ ناءِ۔ پارلیمنٹ تینا بزغر آتا نمائندگی ءِ کیک۔ اوپارے کہ چاہندار آتون اواری اٹ کشت وکشار آ پالیسی اس اتنگ اُن۔ اوپارے کہ طالبان امریکہ معاہدہ غا ہفدہ مارچ آن شرہ کرفنگ والااُن۔ چاہندار امور اوغان ءِ شرہ کن بٹنگ انگ اُن۔ روس آن پد امریکہ نا پیش تمنگ آن پد ہم اوغانستان جنگ و جدل نا گواچی مننگ نا خدشہ ءِ۔ اسپیکر پارے کہ اوغان تینا ویل ءِ تینٹ ایسر کیر نن کمکار نا کڑد ءِ ادا کینہ۔
