اسلام آباد ۔ 6 مارچ (اے پی پی) مزن وزیر ءِ ھاسیں کمکار برائے اھوالکاری ءُ شنگ کاری ڈاکٹر فردوس عاشق اعوان ءَ گوشت کہ زالبول آناں وت مستر جوڑ کنگ ءَ ابید ریاست مدینہ ءِ پجار ءَ را مھکم کنگ نہ بیت، اسلام مئے دین انت ایش قرآن حکیم فرقان حمید ءَ زالبول آنی زندمان ءِ گوازینگ ءُ دیم ءَ جنزگ ءِ رھبند آناں شاھیگان کتگ، اسلام ءِ آیگ ءَ چہ پد چاگرد ئَ زھگ آناں زندہ درگور کنگ ءُ زالبول آناں بھا کنگ ءِ رچ ءَ را ھلاس کت، کانود حکومت ءِ پاکستان ئِ بنیاتی ھک ءِ رکینگ ءِ واھند انت، استیں حکومت زالبول آناں معاشی ھوالگ ءَ وت مستر جوڑ کنگ ءِ واستہ گامگیج چست کنگ ءَ انت۔ امیت انت کہ مئے مات، گوھار، جنکیں زھگ، معاشی جنگ ءَ پاکستان ءَ را مھکم جوڑ کنگ ءَ وتی کرد ءَ پیلو کن انت ءُ مزن وزیرف عمران خان ءِ ٹیمب ءِ اول سرئی ٹولیگ جوڑ بنت۔ اے ھیالانی درشانی آئی ءَ آدینگ ءِ روچ ءَ ھندی ہوٹل ءَ زالبول آنی روچ ءِ ھوالگ ءَ برجم داشتگیں دیوان ءَ شریک بوھگ ءَ پد میڈیا ءَ گوں تران کنان ءَ کت۔
