اوڑدہی ٹی کرونا وائرس نا توننگ، اونا توننگ و پاریز گری کن ہڑتوم آ صوبہ غاتا نیام اٹ کمکاری و معلومداری تا ہل و تس نا میکنزم نا جوڑ کننگ نا فیصلہ
کوئٹہ۔ 06مارچ(اے پی پی) وزیراعلیٰ بلوچستان جام کمال خان و وزیراعلیٰ سندھ سید مراد علی شاہ نا نیام اٹ جمعہ نادے آ داڑے مروک آ اوڑدہی ٹی کرونا وائرس نا توننگ، اونا توننگ و پاریز گری کن ہڑتوم آ صوبہ غاتا نیام اٹ کمکاری و معلومداری تا ہل و تس نا میکنزم نا جوڑ کننگ نا فیصلہ ءِ کننگانے، اوڑدہی ٹی تین پہ تینی است خواہی نا ایلو معاملہ غاتیا خاص وڑاٹ کرونا وائرس نا ویل آ سرجم گپ وتران کننگا۔ صوبائی وزیر سردار عبدالرحمان کھیتران، میر عارف جان محمد حسنی، زمرک خان اچکزئی، عبدالخالق ہزارہ و باسک قومی اسمبلی نوابزادہ عامر خان مگسی ئسک ہم داوخت آ ساڑی ئسر، ہڑتوم آ وزیراعلاک کرونا وائرس ءِ قومی ویل گوندسا اوڑتون مون تننگ کن اواری اٹ کاریم کننگ آن امنا کریر۔ وزیراعلیٰ بلوچستان جام کمال خان و وزیراعلیٰ سندھ سید مراد علی شاہ کرونا وائرس نا توننگ و پاریز گری کن تینا تینا صوبہ غاتے ٹی برجا گام گیج آتا بابت معلومداری فراوان کریر، وزیراعلیٰ بلوچستان پارے کہ تفتان نا کسر پاکستان آ پدی بروک آ زائر آتا بارڈر آ اسکریننگ ءِ کننگ انگ ءِ و اوفتے پاکستان ہاؤس اٹی چانڑدہ دے اکن قرنطینہ ٹی تخنگ انگ ءِ ہراڑے اوفتے خور اتون اوار ایلو آسراتی تے فراوان کننگ انگءِ، کوئٹہ نا ایب اٹ آئیسولیشن سینٹر اس جوڑ کننگ انگ ءِ وخت اس کہ اِر اہسپتال ءِ ہروڑنا ہلہلہ ئی حالیت آتون مون تننگ کن پورو وڑاٹ تیار کننگانے۔ وزیراعلیٰ سندھ پارے کہ تدوک آ منہ دے اٹی ایران و چین آن سندھ آ پدی بروک آ 2300بندغ نا پیدواری مسنے و دا بندغ آتون رابطہ کننگانے، پدی بروک آ بندغ آتے ٹی جکہ، اِل و ایلو علامت آتا دروشم ٹ اوفتا ٹیسٹ ءِ کننگ انگ ءِ وخت اس کہ کراچی نا اسہ پوسکن جوڑ کروک آ 140کٹ آتا ہسپتال ءِ آئیسولیشن سینٹر اٹ بدل کننگانے، اوڑدہی ٹی ایران آن بروک آ سندھ انا زائر آتا اوفتا علاقہ غاتے ٹی پدی ہِننگ نا بابت باندات آتیا ہم گپ وتران کننگا و فیصلہ کننگاکہ زائر آتا سندھ آ پدی ہِننگ نا عمل اٹ ہڑتوم آ صوبہ غاتا تعلقدار کمامدارآتے آرڈینیشن کینہ۔ وزیراعلیٰ سندھ تفتان اٹی زائر آتا خیالداری و اوفتے آسراتی تا فراوانی کن بلوچستان حکومت نا گام گیج آتا ستاءِ کرے۔
