اسلام آباد۔ 06مارچ (اے پی پی) چیئرمین سینیٹ محمد صادق سنجرانی تون تیونس و ایران نا سفیر آک جمعہ نادے آ داڑے جتا جتا اوڑدہی کریر ہراٹی ہڑتوم آ کنڈآتا تعلقداری، تین پہ تینی اہمیت نا باندات آتیا گپ و تران کننگا۔ سینیٹ سیکرٹریٹ نا رداٹ چیئرمین سینیٹ محمد صادق سنجرانی تیونس نا سفیر برھان الکامل تون گپ و تران کرسا پارے کہ پاکستان تیونس تون تعلقداری تے قدر انا نظر اٹ ہرک۔ اوپارے کہ گوادر پاکستان نا مون آ بروک آ پورٹ سٹی ءِ۔ تیونس نا زرکار آک گوادر اٹی ساڑی آ زرکاری نا وارخواہی تیان فائدہ ہرفنگ کیرہ۔ اوپارے کہ پاکستان اٹی زرکاری کن چاگڑد سازگار ءِ۔ پارلیمانی ڈل آتا ہن و بر، واپاری و اقتصادی رابطہ غاتے پین ودفنگ نا گرج ءِ۔ چیئرمین سینیٹ محمد صادق سنجرانی ایرانی سفیر سید محمد علی حسینی تون گپ وتران کرسا پارے کہ کرونا وائرس جہانی ءُ ویل اس جوڑ مسنے۔ اوپارے کہ ایران اٹی کرونا وائرس نا سوب مروک آ جانی نسخان آ غمزدہ اُن۔ ایران نا حکومت و تعلقدار ادارہ غاتا وائرس نا مون ءِ توننگ نا بابت آن کوشست آک ستاکڑزرہ۔ چیئرمین سینیٹ پارے کہ پاکستان ایران سیم آ سکریننگ کن گچین بست و بند کننگانے، ایران وپاکستان نا نیام اٹ گچین تعلقداری ءِ۔
