واشنگٹن۔ 06مارچ (اے پی پی) امریکہ ٹی پاکستان نا سفیر ڈاکٹر اسد مجید خان پارینے کہ اولمپک گیمز اٹی ہشت وار گولڈ میڈل ءِ کٹوک آ جمیکا نا ایتھلیٹ یوسین بولٹ ءِ پاکستان نا چنا چنا چاہک، کنا است خواہی ءِ کہ او پاکستان نا دورہ ءِ کے ہراڑے او تینا ملک انا عظیم سفیر مننگ کیک۔ جمیکا نا پنی آ ہردے ئی ”دی سٹار“ ءِ انٹرویو ٹی ڈاکٹر اسد مجید خان پارینے کہ یوسین بولٹ پاکستان تون اوار مچ آ دنیا ٹی عظیم اولمپک لیجنڈ نا وڑاٹ چاہنگک۔ واشنگٹن آن پاکستانی سفارت خانہ غان جاری بیان نا رداٹ پاکستانی سفیر پارے کہ تینٹ اونا تینا چناک ہم یوسین بولٹ انا فین ءُ و اودااست خواہی نا درشانی ءِ کرینے کہ ای یوسین بولٹ اتون سیلفی اس الیو۔ اومستی پارے کہ پاکستان نا ساڑی وزیراعظم عمران خان تینٹ ہم اسہ سپورٹس مین اسے۔ اوپارے کہ ہڑتوم آ ملک آتا نیام اٹ ہڑتوم آ کنڈآتا تعلقداری خاص وڑاٹ واپاری تعلقداری ٹی پین گچینی اتنگک۔ ہڑتوم آ ملک آک گوازی تا سامان تا واپار و کوچنگ آتون اوار چندی بشخ آتے ٹی اسہ ایلو نا آزموندہ غاتیان فائدہ ہرفنگ کیرہ۔
