اسلام آباد۔ 06مارچ (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ ننا ہر چار آ ہمسایہ ملک آتے ٹی کرونا وائرس نا کیس آک ساڑی ءُ، بنجائی حکومت صوبائی حکومت تون اواری اٹ قومی ایکشن پلان آ عملدرآمد ءِ پک کننگ ءِ، وزیراعظم عمران خان نا کماشی ٹی کابینہ نا باسک و پارلیمنٹرین غٹ اواری اٹ کرونا وائرس تون مون تننگ کن پرعزم ءُ۔ جمعہ نادے آ ڈاکٹر ظفر مرزا نا کماشی ٹی جہانی ادارہ غاتا نمائندہ غاتا دیوان اس اڈ ہلک۔ دیوان اٹی بنجائی سیکرٹری ہیلتھ ڈاکٹر سید توقیر شاہ، ایگزیکٹو ڈائریکٹر قومی جان جوڑی، جہانی ادارہ جان جوڑی نا نمائندہ پاکستان ڈاکٹر پلیتھا ماہی پالانے ئسک ہم بشخ ہلکر وخت اس کہ دیوان اٹی 21جہانی ادارہ غاتا نمائندہ غاک ہم ساڑی ئسر۔ داوخت آ ڈاکٹر ظفر مرزا کرونا وائرس تون مون تننگ کن بست و بند آتا بارواٹی حوال تس۔ اوپارے کہ ننا ہر چار آ ہمسایہ ملک آتے ٹی کرونا وائرس نا کیس ساڑی ءِ، بنجائی حکومت صوبائی حکومت آتون اواری اٹ ایکشن پلان آ عملدرآمد ءِ پک کننگ ءِ، ڈاکٹر ظفر مرزا پارے کہ وزیراعظم عمران خان نا کماشی ٹی کابینہ وپارلیمان نا باسک آک غٹ اواری اٹ کرونا وائرس تون مون تننگ کن پرعزم ءُ۔ اوپارے کہ الس ءِ رکھ فراوان کننگ کن حکومت تینا غٹ وسیلہ غاتے کاریم اٹ اتنگ ءِ۔ ڈاکٹر ظفر مرزا پارے کہ مچ آ ملک اٹی ڈی ایس آر یو نا نظام ءِ غٹ ضلع غاتے ٹی ودفنگ نا فیصلہ کننگانے۔ پاکستان اٹی داوخت اسکان شش کیس رپورٹ مسنو۔ اوپارے کہ نن وخت آ المی گام گیج آتے پک کرینن۔ جہانی ادارہ غاتا نمائندہ غاک پاکستان نا گام گیج و بست و بند آتا ستاءِ کرینو وخت اس کہ جہانی ادارہ غاتا نمائندہ غاک دا چیلنج اتون مون تننگ کن تینا کنڈآن ہروڑنا کمکاری نا باوری کرفینو۔
