کورونا وائرس نا ساڑی آ حالیت آتون مون تننگ کن بلوچستان حکومت تون پورو کمک کینہ
کوئٹہ۔ 06مارچ (اے پی پی) بنجائی وزیر داخلہ سید اعجاز شاہ پارینے کہ کوروناوائرس نا ساڑی حالیت آتون مون تننگ کن بلوچستان حکومت تون پورو کمک کینہ پاک ایران سیمی علاقہ ٹی اِرا ہزار زائر انڈر آبزرویشن ءُ ڈیہہ ٹی کرونا وائرس آن کم زہمی ملک آتے ٹی اوار اُن، حالیت آتے وزیراعظم پاکستان تینٹ مانیٹر کننگ ءِ، کرونا وائرس آن مون تروک حالیت آتون مون تننگ کن بلوچستان حکومت ءِ درکار طبی و تشخیصی گڑا فراوان کننگ اُن۔ داخیال آتا درشانی ءِ او میڈیا نا نمائندہ غاتون گپ وتران کرسا کرے داوخت آ چیف سیکرٹری بلوچستان کیپٹن (ریٹائرڈ) فضیل اصغر آئی جی بلوچستان محسن حسن بٹ و ایلو کمامدارآک ساڑی ئسر۔ وزیر داخلہ پارے کہ پاک ایران بارڈر آ زائر آتا دباؤ ءِ کم کننگ کن سلاہ تننگانے کہ بارڈر آ ساڑی غٹ صوبہ غاتا زائر آتے اوفتا صوبائی حکومت آک تینا صوبہ غاتیا درسا انڈرآبزرویشن تخر و کیئر کیر اوپارے کہ کرونا وائرس نا رداٹ پاکستان نا پوزیشن ایلو ملک آتا نسبت جوان ءِ، بنجائی و صوبائی حکومت آک تینا زمواری تیان جوانی اٹ بلد ءُ و ہراگام گیج آتا ہرفنگ درکار ئس ہرفنگانے، پاک ایران بارڈر آ زائر آتا طبی معائنہ ءِ کننگ کن غٹ تر آسراتی تا فراوانی ءِ پک کننگانے ولے اسہ ہیت اس یات تخنگ نا ءِ کہ دا المی اف کہ کرونا وائرس چین یا ایران نا دورہ غان تالان مس جکہ نزلہ و زکام نا غاوتیا دمدستی وڑاٹ تشخیص کن رجوع کننگے تانکہ دانا ودنگ اٹ ودکی مف میڈیا الس ءِ شعوری آگاہی نا فراوانی کن تینا کڑد ءِ ادا کے، اسہ سوج اسے نا ورندی ٹی وزیر داخلہ پارے کہ بنجائی حکومت مولانافضل الرحمان تون ہچ ءُ وعدہ اس کتنے داہیت ءِ مولاناہی پاننگ کیک کہ اوڑتون وعدہ دیر اس کرے وزیرداخلہ پارے کہ پاکستان اٹی امن و ایمنی نا حالیت آتے ٹی نمان گچینی بسنے و مچ آ دنیا ٹی داسہ پاکستان پرامن ڈیہہ سے نا وڑاٹ چاہنگ انگ ءِ اوپارے کہ بلوچستان اٹی امن و ایمنی نا حالیت مستین نا مقابلہ ٹی نمان گچین مسنو صوبہ ٹی دہشت گردی نا ساڑی آ واقعہ غاک چراغ نا کہوک آ آخیریکو شعلہ غاک ءُ صوبہ نا رونق آک پدی بسنو و مارکیٹ آک آباد ءُ، وزیر داخلہ پارے کہ بنجائی حکومت کرونا وائرس تون مون تننگ کن صوبائی حکومت آتون رابطہ ٹی ءِ و دا چرجوئی ٹی بنجائی حکومت ہروڑ کمک کننگ کن تیار ءِ۔
