اسلام آباد۔ 06مارچ(اے پی پی) بنجائی وزیر اقتصادی امور حماد اظہر پارینے کہ ساڑی حکومت ورناتے تعلیم و کسب نا فراوانی تون اوار اوار اوفتے روزگار نا اسہ وڑ وارخواہی فراوان کننگ کن غٹ تر المی گام گیج کننگ ءِ، چنکا و نیامئی درجہ نا کاروبار (ایس ایم ایز) ءِ مون آ دننگ انگءِ، ورناک علم آ مبنی زرگزران اٹی مہارت دوئی کننگ آ چکار تخر۔ داخیال آتا درشانی ءِ او جمعہ نادے آ داڑے برٹش کونسل نا کنڈآن سوچ لیڈر شپ سمٹ 2020ء آن بطور مہمان خاص تران کرسا کرے۔ بنجائی وزیر پارے کہ ورناک دا ملک انا نہادی میرات ءُ و اوفتے اسہ وڑ وارخواہی نا فراوانی ننا اولیت ءِ، ورناتے نئے بیرہ پوسکن آ تعلیم، ٹیکنالوجی و کسب آن آراستہ کننگ انگ ءِ بلکن اوفتے روزگار نا اسہ وڑ وارخواہی فراوانی ءِ ہم پک کننگ انگ ءِ۔ بنجائی وزیر پارے کہ ساڑی دور علم آ مبنی زرگزران نادور ءِ و داٹی ہمو قومک مون آ بریرہ ہراپوسکن آ تعلیم، ٹیکنالوجی و کسب آن آراستہ مریر، ننا ورناتے کن علم آ مبنی زرگزران اٹی بڑزکو مہارت نا دوئی کننگ آ چکار کننگ المی ءِ، دا مسخت کن حکومت غٹ تر المی گام گیج کننگ ءِ۔ حماد اظہر پارے کہ ساڑی حکومت بڑزکو تعلیم نا مون آ دننگ آ خصوصی چکار کننگ ءِ۔ ساڑی ہی ٹی حکومت ورناتے احساس پروگرام نا رداٹ وظیفہ تننگ نا اسہ بھلو پروگرام اسے نا بناءِ کرے ہرانا ملکی تاریخ اٹی مٹ ملپک۔ اسکالر شپ پروگرام آن دا لائخ آ ورناتے بڑزکو تعلیم نا دوئی و مون آ ہِننگ نا موقع ملک ہرا فتے تون وسیلہ الوکہ۔ داڑتون اوار اوار بڑزکو تعلیم نا کمیشن ءِ پین فعال و گچین کننگ انگ ءِ، ساڑی حکومت نا کنڈآن دارداٹ 20 ارب روپئی آن زیات نا مالیت نا فنڈ فراوان کننگ انگ ءِ۔ اوپارے کہ حکومت نا پبی کوشست ءِ کہ بروک آ سال آن غٹ اسکول آتے ٹی اسہ وڑ نصاب اس رائج کننگ مرے۔ بنجائی وزیر پارے کہ چنکا و نیامئی درجہ نا کاروبار (ایس ایم ایز) ءِ مون آ دننگ انگءِ، دا بشخ نجی بشخ اٹی روزگار نا فراوانی نا اسہ بھلو ذریعہ سے و حکومت دا بشخ انا گچینی کن چندی گام گیج آتے ہرفینے ہرافتے ٹی فنڈ آتا فراوانی ہم اوار ءِ داکان بیدس بینک و مالیاتی ادارہ غاتے ایس ایم ای بشخ اکن فنڈ آتا فراوانی نا است بڈی ءِ کننگ انگ ءِ، حکومت اسٹیٹ بینک اتون اواری اٹ بروک آ مسہ 4سال اٹی ایس ایم ای بشخ انا حصہ 16 درسد اسکان ودفنگ کن گام گیج کرینے۔ اوپارے کہ زرگزران نا گچینی کن چست کروک آ گام گیج آتا بھرم مون آ بننگ ءِ، نن ملکی زرگزران ءِ پائیدار و سوگو بنداوتیا استوار کننگ اُن دا مسخت کن ملک اٹی زرکاری و کاروبار اٹی آسانی کن چندی گام گیج چست کننگانے۔ داکان مست برٹش کونسل پاکستان نا کنٹری ڈائریکٹر عامر رمضان بنجائی وزیر و ایلو بشخ ہلوک آتا منت واری ءِ ہرفے و پارے کہ اِرا دے ئی سمٹ پاکستان اٹی راجی و اقتصادی شونداری ٹی ورناتا کڑد آ بامسخت مکالمہ نا اہم فورم اس ثابت مسنے۔
