اسلام آباد۔ 06مارچ (اے پی پی) اسپیکر قومی اسمبلی اسد قیصر تون قزاخستان نا پاکستان اٹی سفیر اکان رخمتلین اوڑدہی کرے۔ اوڑدہی ٹی ہڑتوم آ کنڈآتا تعلقداری تون اوار تین پہ تینی است خواہی نا اہم باندات آتیا گپ و تران کننگا۔ قومی اسمبلی سیکرٹریٹ آن جاری پریس ریلیز نا رداٹ دا وخت آ اسپیکر قومی اسمبلی پارے کہ پاکستان قزاخستان تون تینا تعلقداری ءِ قدر انا نظر اٹ ہرک، پاکستان قزاخستان تون غٹ بشخ آتے ٹی کمکاری ءِ پین سوگو کننگ نا خواہندار ءِ۔ قزاخستان نا کڑد علاقائی امن و سوگوی کن بے کچ اہمیت تخک۔ اسد قیصر پارے کہ ہڑتوم آ ملک آتا نیام اٹ کمکاری ءِ ودفنگ اٹ پارلیمانی سفارتکاری اہم ءُ کڑد اس ادا کننگ کیک۔ اسپیکر قومی اسمبلی پارے کہ گچین مروک آ نمائندہ غاتا الس تون گہرا ءُ رشتہ اس مریک ہنداخاطرآن او قوم تے خڑک اتنگ اٹ کلیدی کڑد ادا کننگ کیرہ، پاکستان قزاخستان نا علاقائی و جہانی فورم تیا شریداری ستاکڑزک۔ جہانی فورم تیا قزاخستان نا کنڈآن ادا کروک آ تعمیری کڑد انا ستاءِ کینہ، ہڑتوم آ ملک آتا نیام اٹ واپاری کچ ہڑتوم آ ملک آتے ٹی ساڑی وارخواہی تون مطابقت تخپک، داٹی گچینی اتنگ نا گرج ءِ، ہڑتوم آ ملک آتے ٹی کشت وکشار، توانائی، تعلیم و واپار نا بشخ آتے ٹی کمکار ی ءِ مون آ دننگ نا گام گیج ہرفنگ نا گرج ءِ، ہڑتوم آ ملک آتا پارلیمان تے تینا الس نا گچین فائدہ غاتے کن اواری اٹ مون آ ہِننگ نا گرج ءِ، پاکستان اٹی پوریا گر برادری کن ویزہ پالیسی ٹی نرمی کننگانے و پاکستان آ بننگ آ ویزہ نا جاری کننگ نا آسراتی فراوان کننگانے۔ اسپیکر قومی اسمبلی پارے کہ قزاخستان نا زرکار آک ہم ویزہ پالیسی ٹی نرمی آن فائدہ ہرفرہ۔ ہڑتوم آ کنڈآتا نیام اٹ فضائی رابطہ غاتا قیام ننا زرگزرانی واپاری کچ اٹی نمان گچینی اتیک۔ قزاخستان نا سفیر پارے کہ اونا پاکستان تون تینا دوستانہ تعلقداری ءِ بھاز اہمیت ایتک۔ قزاخستان۔ پاکستان سنگتی ہڑتوم آ ملک آتے پین خڑک اتنگ اٹ ہم گرنچ کننگ اٹ اہم ءُ مزل اسے نا نشان مریک، ہڑتوم آ ملک آتا نیام اٹ واپار و تعلیم نا بشخ آتے ٹی کمکاری ءِ ودفنگ مریک، قزاخستان نا الس پاکستانی الس تون گہری محبت تخرہ، ہڑتوم آ ملک آتا نیام اٹ السی و واپاری رابطہ غاتے ودفنگ اٹ پارلیمانی کہول آ ڈل آتا ہن و بر اہم ءُ کڑد اس ادا کننگ کیک، اسلام آباد و الماتے نا نیام اٹ براہ راست فضائی رابطہ مننگ آن ہڑتوم آ ملک آتے ٹی واپار و سیل و سوات ءِ مون آ دننگ مریک۔
