کوءٹہ ۔ 05 مارچ(اے پی پی) ترجمان حکومت بلوچستان لیاقت شاہوانی پارینے کہ شونداری ڈٹ آتے ٹی راجی شونداری نا حامل ڈٹ آتے اولیت تننگ انگ ءِ تانکہ الس نا راجی و آسراتی ممکن مننگ کے، اوپارے کہ حکومت بلوچستان وزیراعلیٰ بلوچستان جام کمال خان عالیانی نا کماشی ٹی تعلیم، جان جوڑی، کنوئی آ ساف دیر انا فراوانی، امن و ایمنی نا بحالی و انفراسٹرکچر ڈویلپمنٹ آ خصوصی چکار کننگ ءِ، داکان بیدس پیدواری بشخ ہراٹی کشت وکشار، لائیو اسٹاک ، ماہی گیری ، مائینز ومنرلز نا شونداری، آبی وسیلہ غاتا گچین کاریم اٹ اتنگ، ڈیم تا تفنگ ، ہن و بر نا ذراءع کن سڑک آتا جال، انرجی، تکنیکی و فنی تعلیم نا فراوانی، دودوربیدگ و سیل و سوات نا مون آ دننگ، زالبول چنا واقلیت آتا حق انا رکھ کون آ گام گیج آتے ٹی دے ونن کوشست کننگ ءِ ۔ ترجمان مستی پارے کہ حکومت صوبہ ٹی گوازی تا مون آ دننگ کن ہم ہروڑاٹ گام گیج کننگ ءِ ہراڑآن غیر نصابی سرجزآتے مون آ دننگک و ورناتا گچین تربیت ممکن مننگ کیک و اواسہ سرسہب شاری اس جوڑ مرسا ملک و قوم انا پن ءِ روشنا کننگ کیرہ ۔ اوپارے کہ ساڑی صوبائی حکومت وزیراعلیٰ بلوچستان جام کمال خان نا کماشی ٹی ہندن ءُ گام گیج کننگ ءِ ہرافتا مستین اٹ مٹ ملپک ۔ ساڑی حکومت نا مشن شون ہلوک بلوچستان ءِ و او تینا مشن اٹ ضرور سرسہب مریک ۔
